Қазақстан құрамасы анықталды.
Алматыдағы екі мектептің бес оқушысы FIRST Global Challenge 2026 әлем чемпионатында ел намысын қорғауға мүмкіндік алды, деп хабарлайды DKNews.kz.
Астанада өткен ұлттық іріктеуге Қазақстанның әр өңірінен және Өзбекстаннан келген шамамен 40 команда қатысты. Жарыс қорытындысында әлемдік додаға баратын бес оқушы таңдалды.
Құрамаға Алматыдағы екі мектептің оқушылары енді
Қазақстан атынан жарысқа:
- Абдулла Арнұр Нұрланұлы;
- Бердали Аспандияр Хамитұлы;
- Серік Нұртас Ерболұлы;
- Ендібай Ерасыл Ділмұрадұлы;
- Мақсұт Хусейн Асетұлы қатысады.
Олардың барлығы Алматыдағы Махатма Ганди атындағы №92 мамандандырылған лицей мен Ыбырай Алтынсарин атындағы №159 гимназияның оқушылары.
Ұлттық кезең Астанадағы Қазақ ұлттық спорт университетінің базасында өтті. Іріктеу қорытындысында осы бес оқушы Қазақстан атынан әлем чемпионатына қатысу құқығын иеленді.
Қазақстан бесінші әлем чемпионы атағына таласады
Жаңа құраманың алдында үлкен міндет тұр. Қазақстан құрамасы робототехникадан әлем чемпионатында бұған дейін төрт рет жеңіске жеткен.
Биыл FIRST Global Challenge Оңтүстік Кореяның Инчхон қаласында өтеді. Әлемдік додаға 190 елден 1 мыңнан астам қатысушы жиналады.
Қазақстандық оқушылар үшін бұл жарыстың тағы бір маңызды қыры бар. 2026 жылдан бастап FIRST Global Challenge жеңімпаздары мен жүлдегерлері «бакалавриат» санаты бойынша «Болашақ» халықаралық стипендиясына үміткер бола алатын халықаралық ғылыми жобалар конкурстарының тізіміне енгізілді.
Биылғы тапсырма орман өрттерімен байланысты
2026 жылғы чемпионаттың негізгі тақырыбы орман өрттеріне арналған.
Қатысушылар өрттің алдын алу, оның салдарын азайту және зардап шеккен аумақтарды қалпына келтіруге бағытталған инженерлік және технологиялық шешімдер әзірледі.
Бұл жерде командаларға робот құрастырумен ғана шектелу жеткіліксіз. Жоба нақты экологиялық мәселеге жауап беріп, инженерия, бағдарламалау және командалық жұмысты бір жүйеге біріктіруі керек.
Ұлттық іріктеуде 40-қа жуық команда бақ сынады
Астанадағы жарысқа Қазақстанның түрлі өңірлерінен 40-қа жуық команда қатысты. Сонымен қатар Өзбекстаннан келген қонақ командалар да өз жобаларын ұсынды.
Ұлттық кезеңді USTEM Foundation қоғамдық қоры Қазақстан Республикасының Оқу-ағарту министрлігі, Жасанды интеллект және цифрлық даму министрлігі, «Дарын» республикалық ғылыми-практикалық орталығы, Astana Hub халықаралық инновациялық кластері және Astana Motors құрамындағы OMODA & JAECOO брендінің қолдауымен ұйымдастырды.
Енді Қазақстанның төрт дүркін әлем чемпионы мәртебесін қорғау осы бес алматылық оқушыға жүктеледі. Инчхонда олар 190 елден келген жас инженерлермен бәсекеге түседі.
Бұған дейін біз Қазақстан құрамасының FIRST Global Challenge халықаралық жарысында робототехникадан әлем чемпионы атанғаны туралы жазған едік.
