Астана әлемдік үстел теннисінің орталығына айналады.
15–20 қыркүйек аралығында елордада алғаш рет WTT Star Contender санатындағы халықаралық турнир өтіп, 18 елден 160 спортшы бас жүлде үшін таласады, деп хабарлайды DKNews.kz.
WTT Star Contender Astana 2026 – President’s Cup Қазақстан Республикасы Президентінің үстел теннисінен дәстүрлі Ашық кубогы аясында өтеді. Жарыс World Table Tennis ресми күнтізбесіне енгізілген.
Астанаға Лебрен, Ван Иди және Овчаров келеді
Турнирдің басты ерекшелігі — қатысушылар құрамы. Жақсылық Үшкемпіров атындағы Жекпе-жек сарайында WTT додаларында, әлем чемпионаттары мен Олимпиада ойындарында тұрақты өнер көрсететін танымал спортшылар бақ сынайды.
Қатысушылар арасында Қытай өкілі Ван Иди, француз Алексис Лебрен, Германия атынан сынға түсетін Данг Цю мен Дмитрий Овчаров, сондай-ақ словениялық Дарко Йоргич бар.
Әйелдер арасында жапониялық Сацуки Одо мен Миу Хирано да Астанада өнер көрсетеді.
Қазақстандық жанкүйерлер үшін тағы бір назар аударарлық есім — Фанг Бо. 2015 жылғы әлем чемпионатының жекелей сындағы күміс жүлдегері Қазақстан атынан Nomad Table Tennis Academy құрамында ойнайды.
Жүлде қоры — 300 мың доллар
WTT Star Contender Astana 2026 турнирінің жалпы жүлде қоры 300 мың АҚШ долларын құрайды.
Жарыс бес санатта өтеді: ерлер мен әйелдер арасындағы жекелей сын, ерлер және әйелдер жұптық бәсекесі, сондай-ақ аралас жұп.
Қазақстандық спортшылар үшін үйдегі Star Contender бірден бірнеше мүмкіндік береді. Олар әлемнің үздік ойыншыларымен бір алаңда кездесіп, жоғары деңгейдегі жарыс тәжірибесін жинай алады және халықаралық рейтингке ұпай қосуға таласады.
Ал көрермендер алты күн бойы әлемдік деңгейдегі спортшылардың ойынын Астанада тікелей тамашалайды.
President’s Cup алғаш рет Star Contender деңгейіне көтерілді
Қазақстан Президентінің үстел теннисінен Ашық кубогы бұған дейін де өткізіліп келген. Алайда 2026 жылы жарыс алғаш рет WTT Star Contender халықаралық сериясымен біріктірілді.
Турнирдің халықаралық құқық иеленушісі және ұйымдастырушысы — ITTF аясындағы World Table Tennis (WTT). Қазақстандағы ұйымдастыру жұмыстарын Nomad Table Tennis Academy атқарады.
Жаңа мәртебе President’s Cup турнирін кәсіби үстел теннисінің халықаралық күнтізбесіне тікелей енгізіп отыр. Қазақстандық ойыншылар енді рейтингтік ұпай үшін өз алаңында күресе алады, ал Астана халықаралық деңгейдегі толыққанды жарыс қабылдайды.
Астана 2027 жылғы әлем чемпионатына да дайындалып жатыр
Star Contender елорда үшін бұдан да ірі дода қарсаңындағы маңызды халықаралық жарыстардың бірі болмақ. Бұған дейін Астанада 2027 жылғы үстел теннисінен әлем чемпионаты өтетіні жарияланған.
Сондықтан қыркүйектегі турнир Қазақстанның әлемдік үстел теннисіндегі позициясын күшейтетін кезекті ірі жарысқа айналады.
Бұған дейін біз Астананың әлемдік үстел теннисінің басты ареналарының біріне айналатыны туралы жазған едік.
WTT Star Contender Astana 2026 – President’s Cup 15–20 қыркүйек аралығында Жақсылық Үшкемпіров атындағы Жекпе-жек сарайында өтеді. Турнирге 18 елден 160 спортшы қатысып, 300 мың доллар жүлде қорын сарапқа салады.
