Киберқауіпсіздік енді еңбек міндетіне кіреді.
Қазақстанда жұмыс берушілер мен қызметкерлердің осы саладағы жауапкершілігі алғаш рет Еңбек кодексінде бекітілді. Сонымен қатар жеке деректерді қорғау мен азаматтардың цифрлық сауаттылығына қойылатын талаптар күшейтіліп жатыр, деп хабарлайды DKNews.kz.
Бұл туралы 10 қыркүйекте Астанада өткен CYBER STEPPE 2026 конференциясының ашылуында ҚР Жасанды интеллект және цифрлық даму вице-министрі Досжан Мусалиев мәлімдеді. Екі күндік шара Alem.ai халықаралық жасанды интеллект орталығында өтіп жатыр.
Киберқауіпсіздық жұмыс беруші мен қызметкерге ортақ міндет болды
Досжан Мусалиевтің айтуынша, биыл Қазақстанда Цифрлық кодекс пен «Киберқауіпсіздік туралы» заң күшіне енді. Сонымен бірге жеке деректерді қорғауға қатысты заңнама жетілдірілді.
Елеулі өзгерістердің бірі еңбек қатынастарына қатысты. Вице-министрдің сөзінше, Еңбек кодексінде жұмыс берушілер мен қызметкерлердің киберқауіпсіздік және кибермәдениет саласындағы міндеттері алғаш рет бекітілген.
«Биыл Цифрлық кодекс пен «Киберқауіпсіздік туралы» заң күшіне енді, жеке деректерді қорғау туралы заңнама жетілдірілді, ал Еңбек кодексінде алғаш рет жұмыс берушілер мен қызметкерлердің киберқауіпсіздік пен кибермәдениет саласындағы міндеттері бекітілді», — деді Досжан Мусалиев.
Бұл талаптар киберқауіпсіздікті тек IT немесе ақпараттық қауіпсіздік мамандарының міндеті ретінде қарастыру тәсілін өзгертеді. Қызметкерлердің корпоративтік сервистерді пайдалану тәртібі, күмәнді хабарламаларды тануы және деректермен жұмыс істеуі де компания қауіпсіздігіне тікелей әсер етеді.
Фишинг пен дипфейк корпоративтік жүйеден әлдеқашан шықты
CYBER STEPPE 2026 конференциясында қаралатын негізгі тақырыптардың бірі — қарапайым азаматтар күн сайын бетпе-бет келуі мүмкін цифрлық қауіптер.
Ұйымдастырушылар фишинг, әлеуметтік инженерия және дипфейктерді ерекше атап өтті. Мұндай қауіптер адамға жұмыс орнында ғана емес, үйде немесе смартфоннан әлеуметтік желі қарап отырған кезде де кездесуі мүмкін.
Сондықтан конференцияға тек ақпараттық қауіпсіздік мамандары емес, мемлекеттік органдар, бизнес, банк секторы, стартаптар мен білім беру ұйымдарының өкілдері қатысып жатыр.
Shadow AI компаниялар үшін жеке тәуекелге айналды
Конференцияның бірінші күні мемлекет пен бизнестің нақты кибертұрақтылығына арналған.
Бағдарламадағы негізгі тақырыптардың бірі — Shadow AI, яғни қызметкерлердің компания ресми түрде бақыламайтын жасанды интеллект құралдарын қолдануы.
Қатысушылар ақпараттық қауіпсіздіктің сервистік моделінің экономикасын, мемлекеттік сектор үшін кешенді шешімдерді сатып алудағы заңнамалық кедергілерді және мемлекеттік органдарға бағытталған өзекті кибершабуыл сценарийлерін талқылайды.
Жасанды интеллекттің өзі де екі қырынан қарастырылады: бір жағынан, ол қорғаныс жүйелерін күшейте алады, екінші жағынан, жаңа қауіптердің пайда болуына жағдай туғызуы мүмкін.
Техникалық тректерде үлкен тілдік модельдерге жасалатын шабуылдар, жасанды интеллект көмегімен фишингті анықтау және APT-шабуылдардың құрылымы талданады.
11 қыркүйекте конференция тұрғындарға ашылады
CYBER STEPPE 2026-ның екінші күні кәсіби аудиториямен шектелмейді.
11 қыркүйекте конференцияға отбасылар, студенттер мен мұғалімдер қатыса алады. Бағдарлама қарапайым тіл мен практикалық форматқа негізделген.
Ата-аналар мен балаларға кибербуллинг және онлайн ойындардағы қауіптер туралы интерактивті тренажерлер мен викториналар ұсынылады.
Сонымен қатар қазақ және орыс тілдеріндегі қазақстандық цифрлық тренажер таныстырылады. Бағдарламада 2011–2026 жылдар аралығындағы хакерлік топтардың қарсы тұру тарихына арналған дәріс пен ата-аналарға арналған сұрақ-жауап сессиясы бар.
Екі күнде 3000-нан астам адам қатысады
Ұйымдастырушылар конференцияға 3000-нан астам қатысушы келеді деп күтеді.
Олардың 2000-нан астамы Астанадағы шараларға офлайн қатысады. Тағы 1000-нан астам адам Алматы, Шымкент және өңірлерден онлайн қосылады.
Екі күн ішінде 20-дан астам спикер мен сарапшы сөз сөйлейді.
CYBER STEPPE республикалық Кибермәдениет айлығын ашады. Досжан Мусалиевтің айтуынша, айлық KazHackStan 2026 шарасымен аяқталады.
«Біздің басты мақсатымыз — азаматтарды интернет-алаяқтық пен киберқауіптерді тануға, жеке деректеріне жауапкершілікпен қарауға және цифрлық сервистерді қауіпсіз пайдалануға үйрету», — деді вице-министр.
