Жөндеуге 384 млрд теңге бағытталды. Қазақстанда жылыту маусымы қарсаңында электр станциялары, электр және жылу желілерін қамтитын ірі жөндеу науқаны шешуші кезеңге кірді, деп хабарлайды DKNews.kz.
Биыл электр станцияларында 9 энергоблок, 55 қазандық және 51 турбинаны күрделі жөндеу жоспарланған. Қаржыландыру көлемі былтырғы деңгейден 9 пайызға жоғары. Бұл туралы Мемлекеттік энергетикалық қадағалау және бақылау комитеті төрағасының орынбасары Ернар Хасенов Орталық коммуникациялар қызметінде мәлімдеді. Деректерді Энергетика министрлігі де жариялады.
Негізгі 50 жабдықтың жөндеуі аяқталды
Қазір жөндеу жұмыстары 3 энергоблокта, 26 қазандықта және 21 турбинада жалғасып жатыр.
Ал 50 негізгі жабдықта күрделі жөндеу толық аяқталды. Олардың қатарында:
- 4 энергоблок;
- 28 қазандық;
- 18 турбина бар.
Яғни жөндеу науқаны аяқталған жоқ. Жылыту маусымы жақындаған сайын негізгі мәселе қалған жабдықтарды белгіленген мерзімде іске қосуға тіреледі.
Комитет пен оның аумақтық департаменттері энергетикалық нысандардағы жұмыстың сапасы мен кестесінің сақталуын тұрақты бақылап отыр.
17 мың шақырым электр желісі жөнделді
Электр желілеріндегі негізгі жұмыстың басым бөлігі орындалған.
Энергетика министрлігінің соңғы дерегіне сәйкес, биыл жоспарланған 17,1 мың шақырым электр беру желісінің іс жүзінде барлығы дерлік күрделі жөндеуден өтті. Жоспардағы 444 қосалқы станцияның 404-інде жұмыс аяқталған — бұл 91 пайыз. Бұдан бөлек, 3209 тарату пункті мен трансформаторлық қосалқы станция жөнделді.
Ернар Хасенов жүргізіліп жатқан жөндеудің негізгі нәтижесі апат қаупін төмендету болуы керектігін айтты.
«Жылыту маусымына дайындық аясында 17 мың шақырым электр беру желілерінде және 404 қосалқы станцияларында күрделі жөндеу жұмыстары аяқталды. Қабылданған шаралардың қорытындысы бойынша электр станцияларындағы орташа тозу деңгейі 52%-ға, электр желілері бойынша 65%-ға дейін төмендеу күтілуде. Жүргізіліп жатқан жұмыстардың негізгі мақсаты – энергетикалық нысандардың сенімділігін арттыру және технологиялық бұзушылықтардың алдын алу. Осы бағытта қабылданып жатқан шаралардың нәтижесінде ағымдағы жылдың 7 айының қорытындысы бойынша электр станцияларындағы технологиялық бұзушылықтар саны 5,6-ға төмендеді», – деді Ернар Хасенов.
Жылу желілеріне тағы 196,8 млрд теңге қарастырылған
Жылумен қамту инфрақұрылымына жеке ауқымды қаржы бөлінген.
2026 жылы 377 шақырым жылу желісін жөндеу және реконструкциялауға 196,8 млрд теңге қарастырылды. Қазіргі кезде жоспарланған жұмыстың 89 пайызы орындалған.
Қаржыландыру бірнеше көзден қалыптасты:
- 82,5 млрд теңге — бюджет қаражаты;
- 98,1 млрд теңге — «Энергетикалық және коммуналдық секторларды жаңғырту» ұлттық жобасы;
- 16,2 млрд теңге — кәсіпорындардың тарифтік сметалары.
Бұдан бөлек, энергетикалық инфрақұрылымды қысқа дайындау үшін Үкімет резервінен 27,9 млрд теңге бөлінді. Оның 12,7 млрд теңгесі жылу көздерін жөндеу мен салуға, 8,4 млрд теңгесі жылу желілерін салу және реконструкциялауға, тағы 6,8 млрд теңгесі электр желілерін жаңартуға бағытталды.
Тозу деңгейін 48 пайызға дейін түсіру көзделген
Жөндеу науқанының басты көрсеткіші жұмсалған қаражат немесе ауыстырылған құбыр көлемі емес, инфрақұрылымның техникалық жағдайының жақсаруы болмақ.
Жыл қорытындысында жылу желілерінің орташа тозуын 48 пайызға дейін, электр станцияларындағы тозуды 52 пайызға дейін, электр желілеріндегі көрсеткішті шамамен 65 пайызға дейін төмендету күтіледі.
Бұл мәселе бірнеше жылдық жаңғырту бағдарламасының бір бөлігі. Энергетика министрлігінің жоспары бойынша, бес жыл ішінде Қазақстанда 1,6 мың шақырым жылу және 78 мың шақырым электр желісін жаңарту көзделген. 2029 жылға қарай жылу желілерінің тозуын 52-ден 42 пайызға, электр желілерін 74-тен 45 пайызға дейін төмендету жоспарланып отыр.
Қыс алдындағы басты мәселе — қалған жөндеуді аяқтау
2025 жылы Қазақстанның энергетикалық кәсіпорындарында 10 энергоблок, 63 қазандық және 39 турбина жөнделген. Сол жылғы жөндеу науқанына 411 млрд теңге жұмсалып, ЖЭО-лардың тозуы 64-тен 61 пайызға дейін төмендеген еді.
2026 жылғы науқанның құрылымы өзгеше: 9 энергоблок, 55 қазандық, 51 турбина және жүздеген шақырым жылу желісі қамтылып отыр.
Қазір электр желілеріндегі жұмыстың басым бөлігі аяқталып, жылу желілеріндегі орындалу деңгейі 89 пайызға жетті. Бірақ электр станцияларында ондаған қазандық пен турбина әлі жөндеуде. Сондықтан жылыту маусымы алдындағы негізгі көрсеткіш енді бөлінген қаржы емес, осы жабдықтардың кестеге сай жұмысқа қайтарылуы болады.
Бұған дейін біз Қазақстанда энергетиканы қысқа дайындауға 384 млрд теңге бөлінгені және өңірлердегі жөндеу қарқыны туралы жазған едік. Тамыздың соңында жылу желілеріндегі жұмыстардың 65 пайызы орындалса, қазіргі ресми көрсеткіш 89 пайызға жетті.
