ҚазҰУ-ға 8117 білім алушы қосылды. Жаңа оқу жылында университет студенттерді жасанды интеллект, ғылым және цифрлық экономикаға бейімдеуді негізгі міндеттердің бірі ретінде белгілеп отыр, деп хабарлайды DKNews.kz.
Әл-Фараби атындағы Қазақ ұлттық университетінің Басқарма Төрағасы – Ректор Жансейіт Түймебаев студенттермен кездесуде оқу орнының цифрлық трансформациясы мен жастарға қойылатын жаңа талаптар туралы айтты. Кездесуге бірінші курс студенттері, «Алтын белгі» иегерлері, халықаралық олимпиадалар мен жарыстардың жеңімпаздары және белсенді жастар қатысты.
8117 білім алушының 674-і — «Алтын белгі» иегері
Қазір ҚазҰУ-да 30 мыңға жуық студент білім алады. 2026–2027 оқу жылында университет қатарына барлығы 8117 білім алушы қосылды.
Университеттің қабылдау қорытындысында бұл көрсеткіштің құрылымы да нақтыланған: бакалавриатқа 6236 студент қабылданды. Олардың арасында 674 «Алтын белгі» иегері, республикалық және халықаралық жарыстарда жетістікке жеткен 46 спортшы бар. Мемлекеттік грант алған 84 студент ҰБТ-дан 130-дан жоғары балл жинаған.
Соңғы көрсеткіш өткен жылмен салыстырғанда 86,7%-ға өскен. Университет үшін бұл жаңа студенттердің саны ғана емес, академиялық нәтижесі жоғары талапкерлер үшін бәсекенің күшейіп отырғанын көрсетеді.
ҚазҰУ студенттерді цифрлық экономикаға дайындамақ
Кездесудегі негізгі тақырыптардың бірі жасанды интеллект пен цифрлық технологиялар болды. Университет басшысы Қасым-Жомарт Тоқаевтың осы бағыттағы тапсырмалары аясында ҚазҰУ-да атқарылған жұмыстардың нәтижелерін таныстырып, алдағы жоспарлар жөнінде айтты.
Жансейіт Түймебаев цифрландырудың университет үшін технология енгізумен ғана өлшенбеуі керектігіне назар аударды.
«Біз үшін ең басты құндылық – студент. Сондықтан цифрлық өзгерістер ең алдымен жастардың сапалы білім алуына, ғылыми ізденісіне және кәсіби дамуына қызмет етуі керек. ҚазҰУ студенттері еліміздің цифрлық экономикасын қалыптастыратын жаңа буын мамандары болуы тиіс», – деді ректор.
Мұның еңбек нарығына тікелей қатысы бар. Университет жаңа технологияларды пайдаланатын түлектерді ғана емес, ғылыми зерттеу мен инновациялық жобаларға қатыса алатын мамандарды даярлауға басымдық беріп отыр.
Қазақстанда бұл бағыт мемлекеттік деңгейде де күшейтілген. 2026 жыл Цифрландыру және жасанды интеллект жылы болып жарияланды, ал елдегі цифрлық трансформацияның негізгі бағыттарының қатарында деректер экономикасын дамыту мен жасанды интеллектіні жүйелі енгізу белгіленген.
Ғылымға қойылатын талап та өзгереді
ҚазҰУ-дағы жаңа оқу жылы тек студенттерге қатысты өзгерістермен шектелмейді. Университет факультет декандары мен кафедра меңгерушілеріне жеке KPI карталарын енгізіп жатыр.
2026–2027 оқу жылының басымдықтарына сәйкес, оқытушылар мен зерттеушілерді бағалау кезінде ғылыми жарияланымдардың сапасы, халықаралық ынтымақтастық және зерттеулердің практикалық нәтижесі ескеріледі.
Кафедралар үшін Q1–Q3 деңгейіндегі жарияланымдардың үлесін 70%-ға жеткізу жоспарланған. Оның кемінде 30%-ы халықаралық бірлескен зерттеулер нәтижесінде жариялануы тиіс. Гранттық қаржыландыру тарту, ғылыми әзірлемелерді коммерцияландыру және шетелдік патент алу да бағалау көрсеткіштерінің қатарына енгізіледі.
Яғни студенттерге қойылған «ғылым мен инновацияға қатысу» талабы университеттің өзінің ғылыми саясатына да байланыстырылып отыр.
Цифрлық дағдымен бірге студенттік тәртіпке назар аударылды
Жансейіт Түймебаев кездесуде технологиялық өзгерістермен қатар студенттердің қоғамдық ортадағы жауапкершілігіне тоқталды.
Ректор заң мен тәртіпті сақтау, әдеп нормаларын ұстану, үлкенге құрмет пен кішіге ізет көрсетуді студенттің күнделікті мәдениетінің бір бөлігі ретінде атады. Сондай-ақ жастарды салауатты өмір салтын ұстануға, дұрыс тамақтануға, спортпен айналысуға және зиянды әдеттерден аулақ болуға шақырды.
Кампустың тазалығы мен жасыл желекті сақтау да студенттердің ортақ жауапкершілігі ретінде көтерілді.
Жаңа оқу жылы алдында университеттің өзінде де инфрақұрылымдық жұмыстар жүргізілді. ҚазҰУ жатақханаларды жөндеп, инженерлік және санитарлық-техникалық жабдықтарды жаңартты, ал кампуста жаяу жүргіншілер жолдары мен жарықтандыру жүйелерін ретке келтіру жұмыстары жүргізілді.
Кітап оқу да жаңа буын маманына қойылған талаптың ішінде
Кездесуде цифрлық дағдылармен қатар кітап оқу мәдениетіне де назар аударылды. Жансейіт Түймебаев ұлттық әдебиеттің таңдаулы шығармаларын оқудың маңызына тоқталып, студенттердің кітапқа қызығушылығын арттыру қажеттігін айтты.
Бұл жерде университет студент бейнесін тек технологиялық дағдымен байланыстырмай отыр. ҚазҰУ басшылығының жаңа оқу жылына берген бағдарында ғылым мен жасанды интеллект, кәсіби даму, қоғамдық жауапкершілік және оқу мәдениеті бір талаптар қатарында тұр.
Жүздесу соңында Жансейіт Түймебаев студенттердің жаңа идеялары университеттің дамуына ықпал ететінін айтып, жастарды ғылымға, инновацияға және Қазақстанның цифрлық дамуына белсенді қатысуға шақырды.
ҚазҰУ-дағы жасанды интеллект бағыты бұған дейін де студенттік ортаға енгізілген. Өткен жылы біз университетте бірінші курс студенттерін қабылдау рәсімі алғаш рет жасанды интеллектінің қатысуымен өткенін жазған едік.
