103 млн теңге субсидия ісі: Түркістан облысында мүлікке тыйым салынды

Түркістан облысында мал шаруашылығын дамытуға бөлінген мемлекеттік субсидияларды жымқыруға қатысты тергеу аяқталды. Қаржылық мониторинг агенттігінің мәліметінше, келтірілген залал 103 млн теңге, ал сот санкциясымен күдіктілердің мүлкіне тыйым салынған, деп хабарлайды DKNews.kz.

Істі ҚМА-ның Түркістан облысы бойынша департаменті тергеді. Тергеу нұсқасына сәйкес, топ мүшелері ауыл шаруашылығы жануарлары мен асылдандыру жұмыстары туралы жалған мәліметтер көрсетіп, электрондық өтінімдер арқылы субсидия алған.

Төрт жеке кәсіпкерлік пен екі ЖШС пайдаланылған

Тергеушілердің пайымынша, бюджет қаражатын алу үшін төрт жеке кәсіпкерлік, «Нұр-Келес» ЖШС және «Бимен С.» ЖШС пайдаланылған. Олардың барлығы ресми түрде үшінші тұлғалардың атына тіркелген.

ҚМА мәліметінше, күдіктілер бұл кәсіпкерлік нысандарын өздеріне берілген электрондық цифрлық қолтаңбалар, мөрлер және банк шоттарын басқаруға құқық беретін нотариалды сенімхаттар арқылы іс жүзінде бақылауда ұстаған.

«Аталған кәсіпкерлік нысандары арқылы ақпараттық жүйелерге ауыл шаруашылығы жануарларын сатып алу мен олардың қолда бары, сондай-ақ асылдандыру жұмыстарының жүргізілгені туралы көрінеу жалған мәліметтер енгізілген. Кейін осы мәліметтердің негізінде субсидия алуға электрондық өтінімдер берілген», — деп мәлімдеді Қаржылық мониторинг агенттігі.

Агенттік алынған қаражаттың мал шаруашылығын дамытуға жұмсалмағанын хабарлады.

«Бюджеттен алынған қаражат қолма-қол ақшаға айналдырылып, схемаға қатысушылар арасында бөлінген және жеке мақсаттарына жұмсалған», — деп хабарлады ҚМА.

Бұл қаржы адал ауыл шаруашылығы тауарын өндірушілерді қолдауға және өңірдегі мал шаруашылығын дамытуға арналған еді.

Екі үй мен төрт автокөлікке тыйым салынды

Сот санкциясымен күдіктілердің екі тұрғын үйіне, төрт автокөлігіне, автотұрақ орнына және жер теліміне тыйым салынған.

Күдіктілердің бірі қамауға алынған. Екіншісіне кепіл түріндегі бұлтартпау шарасы қолданылған. ҚМА Қылмыстық-процестік кодекстің 201-бабына сәйкес өзге мәліметтерді жарияламады.

Тергеудің аяқталуы күдіктілердің кінәсі дәлелденді дегенді білдірмейді. Адамның кінәсі соттың заңды күшіне енген үкімімен белгіленеді.

Ауыл шаруашылығына бөлінген қаражаттың жұмсалуын бақылау агенттіктің өзге тексерулерін де қамтиды. Бұған дейін ҚМА мал шаруашылығын субсидиялауға қатысты 30 млрд теңгелік тәуекелдерді анықтағаны туралы жазған едік.