Қазақстандық сервистік компанияларға ұзақмерзімді тапсырыс қажет. Энергетика министрлігі ірі мұнай-газ операторларымен бірге отандық тауарлар мен қызметтерге бес жылдық сұраныс қалыптастырып, офтейк-келісімшарттарды кеңейтуді көздеп отыр, деп хабарлайды DKNews.kz.
Бұл туралы Атырауда Қазақстанның Мұнай-газ кеңесі PetroCouncil ұйымдастырған және Энергетика министрлігінің қолдауымен өтіп жатқан IV PetroMaintenance 2026 форумында вице-министр Ерлан Акбаров мәлімдеді.
99,6 млн тонна мұнай сервистік нарыққа жаңа талап қойды
2025 жылдың қорытындысында Қазақстанда мұнай және газ конденсатын өндіру 99,6 млн тоннаға жетіп, бір жылда 13,5%-ға өсті.
Газ өндіру көлемі де айтарлықтай артты — 68,2 млрд текше метр. Бұл 2024 жылғы көрсеткіштен 15,6%-ға жоғары.
Өндірістің мұндай өсуі тек шикізат көлемінің артуын білдірмейді. Жүктеме көбейген сайын қолданыстағы жабдықтың сенімділігіне, өнеркәсіптік қауіпсіздікке, жөндеу мен техникалық қызмет көрсету сапасына қойылатын талап та күшейеді.
Сондықтан PetroMaintenance 2026-ның негізгі тақырыбы жаңа кен орындарын іздеуден гөрі жұмыс істеп тұрған миллиардтаған долларлық активтердің үздіксіз әрі қауіпсіз қызметін қамтамасыз етуге бағытталған.
Қазақстандық компанияларға бес жылдық тапсырыс көкжиегі ұсынылмақ
Отандық бизнес үшін форумдағы негізгі мәселенің бірі — ірі мұнай-газ жобаларының тапсырыстарына қол жеткізу.
Энергетика министрлігі операторлармен бірлесіп қазақстандық тауарларға, жұмыстар мен қызметтерге ұзақмерзімді сұраныс қалыптастыруды көздейді. Соның ішінде жергілікті қамтуды дамытудың бесжылдық бағдарламаларын енгізу және офтейк-келісімшарттар тәжірибесін кеңейту қарастырылған.
«Энергетика министрлігінің негізгі басымдықтарының бірі – ел ішіндегі құндылықты дамыту және қазақстандық сервистік ұйымдарды қолдау. Ірі мұнай-газ жобаларының операторларымен бірлесіп, министрлік отандық тауарларға, жұмыстар мен көрсетілетін қызметтерге ұзақ мерзімді сұраныс қалыптастыру, жергілікті қамтуды дамытудың бесжылдық бағдарламаларын енгізу және офтейк-келісімшарттар жасасу тәжірибесін кеңейту бойынша жүйелі жұмыс жүргізуде. Сондай-ақ ТОО «PSA»-мен бірлесіп инженерлік қызметтерді оқшаулауға ерекше көңіл бөлінуде. Бұл ретте жобалық шешімдер бастапқы кезеңнен-ақ қазақстандық өндірушілердің мүмкіндіктерін ескеретін болады», – деді Ерлан Акбаров.
Бес жылдық жоспарлау сервистік кәсіпорындар үшін принципті мәнге ие. Ұзақмерзімді сұраныс белгілі болған жағдайда бизнес өндірістік қуатты кеңейту, мамандар даярлау немесе жаңа технологияға инвестиция салу туралы шешімді алдын ала қабылдай алады.
Қазақстандық өндірушілерді жобаға бастапқы кезеңнен қоспақ
Тағы бір өзгеріс инженерлік қызметтерді оқшаулауға қатысты.
Министрлік пен PSA жобалық шешімдер әзірленетін бастапқы кезеңнің өзінде қазақстандық өндірушілердің мүмкіндіктерін ескеруге басымдық бермек.
Мұның практикалық айырмашылығы бар. Егер жергілікті компаниялардың технологиялық және өндірістік мүмкіндіктері жоба дайын болғаннан кейін ғана қарастырылса, қажетті жабдық пен техникалық талаптар алдын ала шетелдік жеткізушілерге бейімделіп кетуі мүмкін.
Ал отандық өндірушілерді жобалау сатысында ескеру олардың кейінгі сатып алуларға қатысу мүмкіндігін кеңейтеді.
NCOC пен ТШО-дан QazaqGaz-ға дейін бір алаңға жиналды
PetroMaintenance 2026 форумына мұнай-газ секторындағы ірі тапсырыс берушілер мен сервистік компаниялар қатысып жатыр.
Олардың арасында KAZENERGY қауымдастығы, «Атамекен» Ұлттық кәсіпкерлер палатасы, жергілікті атқарушы органдар, «ҚазМұнайГаз» және QazaqGaz ұлттық компаниялары бар.
Ірі жобалар операторларынан NCOC, «Теңізшевройл», «Силлено» және «ҚМГ ПетроКем» өкілдері қатысуда. Форумға қазақстандық және халықаралық инжинирингтік әрі сервистік кәсіпорындар да келген.
Мұндай құрам форумның практикалық бөлігін күшейтеді: бір алаңда болашақ тапсырысты қалыптастыратын операторлар мен сол жұмысты орындауға мүдделі жергілікті компаниялар кездеседі.
Жасанды интеллект жабдықтың қашан істен шығатынын болжауға көмектеспек
Техникалық қызмет көрсетудің өзі де өзгеріп жатыр.
Форумда мұнай-газ, мұнай өңдеу және мұнай-газ химиясы кәсіпорындарындағы техникалық қызмет көрсету мен жөндеудің тиімділігін арттыру жолдары талқылануда.
Негізгі технологиялық бағыттардың қатарында:
- предиктивті аналитика;
- активтердің тұтастығын басқару;
- жасанды интеллект;
- жабдықтардың цифрлық егіздері бар.
Предиктивті тәсілдің мәні — жабдық істен шыққаннан кейін жөндеумен шектелмей, жиналған деректер арқылы ықтимал ақауды алдын ала анықтау. Өндіріс көлемі өскен жағдайда жоспардан тыс тоқтау тәуекелін төмендету кәсіпорын үшін тікелей экономикалық мәнге ие.
Операторлар мен қазақстандық компаниялар B2B келіссөздерге көшті
Форумның нәтижесі тек панельдік пікірталастармен өлшенбейді.
PetroMaintenance 2026 аясында жер қойнауын пайдаланушылар мен отандық сервистік кәсіпорындар арасында арнайы B2B келіссөздер сериясы ұйымдастырылды.
Негізгі мақсат — қазақстандық бизнестің ірі операторлардың жобаларына қатысуын практикалық деңгейде кеңейту.
Қазақстанда мұнай мен газ өндірісінің өсуі сервистік нарық үшін тапсырыс көлемін арттыру мүмкіндігін береді. Бірақ оның қанша бөлігі ел ішінде қалатыны бесжылдық бағдарламалардың нақты сатып алуларға, офтейк-келісімшарттарға және жергілікті компаниялармен жасалған шарттарға айналуына байланысты болады.
Бұған дейін біз Қазақстандағы мұнай-газ саласының инвестициялық белсенділігі туралы да жазған едік. Саладағы ірі жобалар мен өндірісті кеңейту мұнай сервисі, жабдық өндірісі және қазақстандық мердігерлер үшін жаңа тапсырыстар қалыптастыратын негізгі факторлардың бірі болып отыр.
