Қазақстандық сақтандыру нарығы халықаралық кәсіби стандарттарға тағы бір қадам жасады.
Freedom Insurance Ұлыбританияның Chartered Insurance Institute (CII) ұйымынан International Professional Partner Firm (IPPF) мәртебесін алған Қазақстандағы алғашқы сақтандыру компаниясы болды, деп хабарлайды DKNews.kz.
Бұл мәртебе тек серіктестік атаумен шектелмейді. CII талаптарына сәйкес IPPF компаниясы институттың Этика кодексін ерікті түрде қабылдап, қызметкерлердің кәсіби біліктілігін тұрақты дамытуға және клиент мүддесін басым қоюға міндеттеме алады.
CII мәртебесі компанияға не береді
Chartered Insurance Institute — сақтандыру және қаржылық жоспарлау саласындағы халықаралық кәсіби ұйым. Институт мамандарды даярлау, кәсіби біліктілік пен этика стандарттарын дамыту бағытында жұмыс істейді және халықаралық деңгейде мойындалған оқу бағдарламаларын ұсынады.
Freedom Insurance CII-мен ынтымақтастықты өткен жылы бастаған. Негізгі мақсат — компания ішіндегі сақтандыру сараптамасын күшейту және қызметкерлердің кәсіби білімін халықаралық стандарттарға сәйкестендіру.
Осы уақыт ішінде компания қызметкерлерінің бір бөлігі CII бағдарламалары бойынша білім алып, тиісті біліктілікке ие болды. Қызметкерлердің көбі институтқа жеке мүше ретінде қосылып, кәсіби білім беру ресурстары мен үздіксіз даму құралдарына қол жеткізді.
Шамамен 50 қызметкер CII мүшесі болды
Компания үшін серіктестіктің негізгі практикалық нәтижелерінің бірі — мамандардың кәсіби даярлығы.
Freedom Insurance басқарма төрағасы Азамат Керімбаевтың айтуынша, қазір компанияның шамамен 50 қызметкері Chartered Insurance Institute-тың ресми мүшесі атанған.
Азамат Керімбаев:
«Компаниямыздың шамамен 50 қызметкері осы сақтандыру институтының ресми мүшесі атанды. Енді олар осы ұйымдағы кәсіби деңгейін арттыру үшін тұрақты түрде жаңа білім алып отыруы қажет. Алдағы бір-екі жылда қызметкерлеріміздің біліктілігін айтарлықтай арттырамыз деп ойлаймын. Болашақта білім беру саласында ғана емес, сақтандыру бизнесі бағытында да қауымдастырылған серіктес атануымыз мүмкін», – деді.
Яғни компания үшін IPPF мәртебесінің басты нәтижесі халықаралық атаудың өзінде емес, қызметкерлерді тұрақты оқыту және олардың кәсіби біліктілігін халықаралық деңгейде растау жүйесінде жатыр.
Freedom Insurance CII Этика кодексін қабылдайды
IPPF мәртебесінің тағы бір талабы кәсіби этикаға қатысты.
CII мәліметінше, International Professional Partner Firm мәртебесіне ие ұйым институттың Этика кодексін ерікті түрде қабылдайды және кәсіби стандарттарды сақтап қана қоймай, оларды одан әрі жетілдіруге міндеттеме алады.
Freedom Insurance үшін бұл клиенттердің мүддесін ескеру және сол мүддеге сай әрекет ету қағидатын ұстануды білдіреді. Компания мұны сақтандыру қызметіне деген сенімді арттыру тетіктерінің бірі ретінде қарастырады.
Арнайы IPPF белгісі табысталды
Серіктестік мәртебесі Freedom Insurance басқарма төрағасы Азамат Керімбаевтың CII бас директоры Мэттью Хилл және институттың Таяу Шығыс, Орталық және Оңтүстік Азия елдері бойынша өңірлік директоры Гейнор Джонспен кездесуінде ресми түрде бекітілді.
Компанияға International Professional Partner Firm мәртебесін растайтын арнайы IPPF құрмет белгісі табысталды.
Азамат Керімбаев бұл мәртебеге қол жеткізу үшін компания мен институт арасында ауқымды жұмыс жүргізілгенін атап өтті.
«Chartered Insurance Institute серіктесі мәртебесін алу – компаниямыз үшін өте үлкен әрі маңызды қадам. Бұл мақсатқа жету үшін біз CII-мен бірге ауқымды жұмыс атқардық. Қызметкерлеріміз елеулі дайындықтан өтті. Алдағы уақытта да компаниямыздың қызметкерлерін дамытуға, олардың білімі мен тәжірибесін халықаралық сақтандыру стандарттарына сәйкестендіруге инвестиция салуға дайынбыз. Осы институттың бізді Қазақстандағы серіктес ретінде мойындауы – Freedom Insurance және жалпы холдинг үшін өте маңызды қадам. Біз бұл мәртебені сақтап, CII-мен бірге дамуға күш саламыз. Мұндай ынтымақтастық әріптестеріміздің білімін жүйелеуге және олардың біліктілігін халықаралық деңгейде растауға мүмкіндік береді», – деді Азамат Керімбаев.
Қазақстанның сақтандыру нарығына әсері қандай
CII серіктестік бағдарламасы компанияларға қызметкерлерді оқыту ресурстарына қол жеткізуге, халықаралық кәсіби стандарттарға бағдарлануға және CII-мен байланысын ресми түрде көрсетуге мүмкіндік береді. Институт IPPF мәртебесін сақтандыру мен қаржылық жоспарлауға қоғам сенімін арттыруға бағытталған тетіктердің бірі ретінде сипаттайды.
Freedom Insurance жағдайында басты өзгеріс — халықаралық стандарттарды компанияның ішкі кадр даярлау жүйесіне енгізу. Қазірдің өзінде шамамен 50 қызметкердің CII мүшелігіне өтуі бұл жұмыстың жекелеген мамандарды оқытудан жүйелі кәсіби даярлыққа ауысып келе жатқанын көрсетеді.
Компания алдағы бір-екі жылда қызметкерлерінің біліктілігін айтарлықтай арттыруды жоспарлап отыр. Келесі кезеңде ынтымақтастық білім беру бағытымен шектелмей, сақтандыру бизнесіндегі серіктестікке ұласуы мүмкін екенін Азамат Керімбаев мәлімдеді.
Бұған дейін біз Freedom Insurance-тың Қазақстанда жер сілкінісінен қорғайтын цифрлық сақтандыру өнімін іске қосқаны туралы жазған едік. Компания басшысы Азамат Керімбаев полистің қандай тәуекелдерді қамтитынын және сақтандыру жағдайында төлем қалай жүргізілетінін түсіндірген. Қазақстанда алғаш рет жер сілкінісінен цифрлық сақтандыру пайда болды.
