Қазақстан үш саты жоғарылады.
Жапонияда өткен XX жазғы Азия ойындарында ұлттық құрама 84 медаль иеленіп, жалпыкомандалық есепте сегізінші орынға көтерілді. Енді жарыс аяқталған соң спорт федерацияларының Азиада алдындағы міндеттемелерді қаншалықты орындағаны жеке талданбақ, деп хабарлайды DKNews.kz.
Қазақстан құрамасының қоржынында 12 алтын, 24 күміс және 48 қола медаль бар. 46 ел қатысқан жарыста Қазақстан сегізінші орын алды. Ал 2023 жылы Ханчжоуда өткен алдыңғы Азиадада ұлттық құрама 11-орынмен шектелген еді.
84 медаль Қазақстанды сегізінші орынға шығарды
Алдыңғы Азия ойындарымен салыстырғанда Қазақстан үш орынға жоғарылап, алтын медаль санын арттырды.
Бірақ бұл Азиаданың басты нәтижесі тек медаль санымен шектелмейді. Бірқатар олимпиадалық спорт түрінде қазақстандық спортшылар ел тарихында бұрын болмаған нәтижелерге қол жеткізді.
Ең елеулі серпілістің бірі бокста болды. Қазақстан құрамасы Азия ойындарының алтынын 12 жылдан кейін қайта жеңіп алды.
70 келіге дейінгі салмақта Төрехан Сабырхан, ал 90 келіден жоғары салмақта ұлттық құраманың капитаны Айбек Оралбай чемпион атанды.
Қазақстан бұған дейін бокстан Азия ойындарының алтынын соңғы рет 2014 жылы алған. Кейінгі екі Азиадада ұлттық құрама чемпионсыз қалған еді.
Семсерлесушілер бір маусымда үш ірі титулды жеңіп алды
Қазақстанның ерлер арасындағы шпагамен семсерлесу құрамасы Азия ойындарының тарихи алтынын иеленді.
Финалда қазақстандықтар Оңтүстік Кореяны 43:42 есебімен жеңді. Қарсылас сапында Рио-2016 Олимпиадасының жеке сында чемпион атанған Пак Сан Ён да өнер көрсетті.
Бұл жеңіс Қазақстан құрамасының ерекше маусымына нүкте қойды. Команда Азия чемпионатын жеңіп, тарихта алғаш рет әлем чемпионы атанды, кейін Азиада алтынын алды.
Бұған дейін бір маусымда осы үш ірі турнирде қатар жеңіске жеткен команда болмаған.
Академиялық есу мен таеквондода тарихи алтын
Владислав Яковлев пен Иван Чернухин ерлер арасындағы рульсіз қос ескекті қайық жарысында жеңіске жетті.
Бұл — Қазақстанның академиялық есуден Азия ойындарындағы алғашқы алтын медалі.
Таеквондодан 58 келіге дейінгі салмақта Тамирлан Тілеулес чемпион атанды. Бұл да Қазақстан тарихындағы осы спорт түрінен Азиададағы алғашқы алтын.
Бұл екі нәтиженің маңызы жоғары. Өйткені әңгіме дәстүрлі түрде медаль әкелетін спорт түрлеріндегі кезекті жеңіс туралы емес, Қазақстан үшін жаңа чемпиондық бағыттардың пайда болуы туралы болып отыр.
Луценко рекорд жаңартты, Сұлтанова тарихқа енді
Алексей Луценко жазғы Азия ойындарындағы алтын медаль санын алтыға жеткізді.
Ол Азиададағы жеңістер саны бойынша Қазақстанның ең титулды спортшысы атанды.
Ал Рината Сұлтанова жекелей жарыста жеңіске жетіп, Қазақстан әйелдер велоспорты тарихында Азия ойындарының алтынын алған алғашқы спортшы болды.
Осылайша, велоспорт та Қазақстан үшін рекордтар жаңарған бағыттардың біріне айналды.
Каратэ екі алтын әкелді, MMA дебютте-ақ нәтиже көрсетті
Каратэден Жоламан Биғабыл мен Софья Берульцева чемпион атанды.
Берульцева үшін бұл Азия ойындарындағы екінші алтын медаль.
Ал Азия ойындарының бағдарламасына алғаш рет енген аралас жекпе-жекте Қазақстан бірден көшбасшылар қатарына қосылды.
Еркінғали Бұрқыталин мен Қадырбек Шынбаев алтын медаль жеңіп алса, Санжар Әділов қола жүлдеге ие болды.
Жаңа спорт түрінің алғашқы жарысы Қазақстан үшін бірден екі чемпиондықпен аяқталды.
Дзюдода бес финалдың бәрінде Жапония қарсы тұрды
Қазақстан дзюдо құрамасы алғаш рет төрт бірдей жеке финалға шықты.
Елдос Сметов, Әбиба Әбужақынова, Әділет Алмат және Ажар Асхат күміс жүлдегер атанды.
Қазақстан аралас командалық жарыста да күміс медаль алды.
Бес финалдың барлығында қазақстандықтардың қарсыласы Жапония құрамасының өкілдері болды.
Бұл көрсеткіш бір жағынан Қазақстан дзюдосының финалдық кезеңге тұрақты жететін деңгейін көрсетсе, екінші жағынан алтын үшін күресте Жапониямен арадағы бәсекенің қаншалықты жоғары екенін аңғартты.
Карими Қазақстанды 32 жылдан кейін тұғырға қайтарды
Спорттық гимнастикадан Милад Карими еркін жаттығуда күміс медаль жеңіп алды.
Қазақстан бұл дисциплинада Азия ойындарының жүлдесіне 32 жылдан кейін қайта қол жеткізді.
Күресте де алдыңғы Азиадамен салыстырғанда ілгерілеу бар.
Еркін күрес құрамасы үш қола медаль иеленді. 2023 жылғы Азия ойындарында бұл команда жүлдесіз қалған еді.
Әйелдер құрамасы бір күміс және екі қола медаль алды. Ал 2023 жылы олардың еншісінде бір ғана күміс болған.
Сегізінші орыннан кейін федерациялар есебі басталады
Азиаданың аяқталуы Қазақстан спорты үшін қорытынды кезеңнің біткенін білдірмейді.
Жарыс алдында спорт федерациялары ұлттық құрамалардың нәтижесіне қатысты нақты міндеттемелер алған.
Енді Туризм және спорт министрлігі олардың орындалуын, алдыңғы халықаралық жарыстармен салыстырғандағы динамиканы және нәтижеге әсер еткен факторларды талдауды жоспарлап отыр.
Егер белгілі бір спорт түріндегі қазіргі даярлық жүйесі күткен нәтиже бермегені анықталса, жеке федерациялардағы тәсілдер толық қайта қаралуы мүмкін.
Сонымен бірге халықаралық аренадағы жұмысты күшейту мәселесі де қарастырылмақ.
Сондықтан Қазақстан үшін бұл Азиаданың қорытындысы тек 84 медаль мен 11-орыннан сегізінші орынға көтерілу емес.
Келесі маңызды көрсеткіш — қай федерация өз даярлық жүйесінің тиімділігін дәлелдеді, ал қайсысына оны түбегейлі өзгертуге тура келеді.
