Сақтандыру төлемдері алгоритмдерге өтеді.
Freedom Insurance 2027 жылы сақтандыру төлемдерінің 60%-ына дейінін адамның қатысуынсыз, тек AI-агенттің шешімі негізінде реттеуді жоспарлап отыр, ал цифрлық технологиялар компанияға қазірдің өзінде жылына орта есеппен $10 млн үнемдеуге мүмкіндік берген, деп хабарлайды DKNews.kz.
Бұл туралы Freedom Insurance басқарма төрағасы Азамат Керімбаев AI & Digital Bridge 2026 аясындағы AI-агенттер мен жасанды интеллект көмегімен шешім қабылдаудағы жауапкершілік мәселелеріне арналған сессияда айтты. AI & Digital Bridge 2026 ресми қорытындысына сәйкес, форум Астанада 1–3 қазан аралығында өтіп, бағдарлама аясында 106 панельдік сессия ұйымдастырылды.
2027 жылы төлемдердің 60%-ын AI-агентке бермек
Компаниядағы ең үлкен өзгеріс клиенттерге кеңес беретін чат-боттарда емес, сақтандыру жағдайларын тікелей реттеу процесінде болып жатыр.
Қазір Freedom Insurance автокөлікке келтірілген залалды бағалау үшін компьютерлік көру технологиясын дамытып жатыр. Жоспар бойынша жыл соңына дейін жүйе зақымдарды толық автоматты түрде анықтап, сақтандыру төлемінің мөлшерін есептей алуы тиіс.
Келесі кезең 2027 жылға жоспарланған. Компания сақтандыру төлемдерінің 60%-ына дейінін AI-агенттің шешімі негізінде, адамның қатысуынсыз реттеуді көздеп отыр.
«Бүгінде сақтандыру төлемдерінің 72%-ын 10 күн ішінде жүзеге асырамыз. Ал 2026 жылдың үшінші тоқсанында сақтандыру жағдайын қарау уақыты 32%-ға қысқарды», — деп атап өтті Азамат Керімбаев.
Бұл жерде AI қызметкерге жай ғана көмектесетін құрал болудан қалып, сақтандыру жағдайын бағалап, қаржылық шешім қабылдайтын жүйеге айнала бастайды.
Цифрландыру жылына $10 млн үнемдеуге мүмкіндік берді
Сақтандыру жағдайларын реттеуді цифрландырудың қаржылық әсері де есептелген.
Керімбаевтың айтуынша, технологияларды енгізу компанияның реттеу процесіне жұмсайтын шығындарын жылына орта есеппен $10 млн-ға қысқартқан.
«Бұл реттеу процесіне жұмсалатын шығындарды жылына орта есеппен 10 млн долларға қысқартуға мүмкіндік берді. Яғни компания сақтандыру жағдайларын реттеуге аз қаражат жұмсаса, бұл клиенттеріміз үшін сақтандыру құнының 10 млн долларға төмендегенін білдіреді. Жасанды интеллектіні қолдану клиенттеріміздің қаржылық жағдайына тікелей әсер етеді деуге болады», — деп түсіндірді ол.
Мұнда цифрландыру мен AI-ды ажырата қарау маңызды. Үнемнің бір бөлігі процестерді автоматтандыру арқылы қалыптасса, жасанды интеллект келесі кезеңде деректерді талдап, шешімнің өзін қабылдауға көшеді.
Роботтар өтініштердің 42%-ын толық өңдейді
Автоматтандыру айтарлықтай нәтиже берген бағыттардың бірі — колл-орталық.
Компания жаңа операторларды тұрақты түрде көбейтудің орнына сөйлеу синтезі мен дауыстық аналитиканы енгізген. Ол үшін клиенттермен болған бірнеше жүз мың қоңыраудың жазбасы талданған.
Нәтижесінде клиенттердің негізгі сұрақтары үш бағытқа бөлінген:
- сақтандыру полисін қалай рәсімдеу керек;
- полисті қалай қайта рәсімдеуге болады;
- сақтандыру төлемінің жағдайы қандай.
Осы сұраныстар автоматтандырылып, роботтарға берілген.
«Клиент сақтандыру компаниясына қоңырау шалған кезде үш негізгі сұрақ қоятыны анықталды: сақтандыру полисін қалай рәсімдеуге болады, оны қалай қайта рәсімдеуге болады және сақтандыру төлемімнің жағдайы қандай? Біз осы сұрақтарға жауап беру процесін автоматтандырып, роботтандырдық. Бүгінде қоңыраулардың көлемі үлкен болғанына қарамастан, клиенттеріміздің барлық өтініштерінің 42%-ы роботтардың көмегімен өңделіп, толық аяқталады», — деді сақтандыру компаниясының басшысы.
Бұл модель компанияға клиенттер саны мен қоңыраулар көлемі артқан кезде колл-орталық штатын дәл сондай қарқынмен ұлғайтпауға мүмкіндік береді.
Агросақтандыруда шешімді алгоритм қабылдап жүр
Қаржы секторында AI қаншалықты дербес шешім қабылдай алады деген мәселе әлі де ашық.
Керімбаевтың айтуынша, сақтандыру және басқа қаржы ұйымдары лицензияланатын әрі реттелетін бизнес болғандықтан, қате шешім үшін кім жауап беретіні нақты болуы керек.
«Сақтандыру компаниясы және басқа да қаржы ұйымдары — лицензияланатын әрі реттелетін қызмет түрі. Сондықтан қате шешім қабылданған жағдайда, реттеуші оның жауапты тұлғасын білуі керек», — деді ол.
Алайда Freedom Insurance тәжірибесінде шешімнің алгоритмге толық берілген мысалы қазірдің өзінде бар.
Бұл — агробизнесті параметрлік сақтандыру.
«Біздің компанияда осындай өнім бар — агробизнесті параметрлік сақтандыру. Мұнда спутниктік деректер мен компьютерлік көру технологиясы негізінде алгоритмдер тәуекелдің іске қосылғанын анықтайды. Осы шешімнің негізінде біз агроөндірушілерге төлемді бірден жүзеге асырамыз және мұндай шешім ешкіммен дауланбайды. Бұл, бәлкім, біздің компаниямыздағы шешімді шынымен де алгоритмдер қабылдайтын жалғыз жағдай», — деп атап өтті ол.
Яғни бұл модельде AI қызметкерге ұсыныс беріп қана қоймайды. Алгоритм анықтаған жағдай сақтандыру төлемін жүзеге асыруға негіз болады.
AI қателессе, кім жауап береді
Сақтандырудағы келесі үлкен мәселе технологияның жылдамдығынан гөрі жауапкершілікке байланысты.
Егер алгоритм деректерді талдап, соңғы шешімді адам қабылдаса, жауапкершілік тізбегі түсінікті. Ал AI автокөліктің зақымын өзі анықтап, төлем сомасын есептеп, істі адамның қатысуынсыз реттейтін болса, мәселе күрделене түседі.
Бұл сақтандыру нарығы үшін әсіресе маңызды. Өйткені қабылданған шешім клиентке төленетін нақты ақшаға әсер етеді.
Сондықтан 2027 жылға белгіленген 60% көрсеткіш технологиялық межемен ғана шектелмейді. Ол реттеушілер мен сақтандыру компаниялары үшін AI шешімдерінің жауапкершілік шекарасын нақтылау қажеттігін де алға шығарады.
AI шағын бизнес үшін қымбат болуы мүмкін
Жасанды интеллектіні енгізу барлық компанияға бірдей тиімді емес.
Керімбаевтың айтуынша, AI үлкен деректер көлемі мен клиенттердің ауқымды ағыны бар бизнесте көбірек экономикалық нәтиже береді.
«Егер компания ауқымды бизнес болса, AI-агенттерді енгізу арқылы тиімділіктің артқанын сезіне алады. Ал деректер көлемі немесе клиенттер саны көп емес бизнесте AI әзірлемелері соншалықты тиімді болмауы мүмкін. Мұндай жағдайда оларды енгізу құны алынатын қаржылық үнемнен асып кетуі ықтимал. Сақтандыру және қаржы компанияларындағы әріптестеріміз AI әзірлемелеріне ай сайын 50 мың долларға дейін жұмсайды. Бұл білім базасын жетілдіруге және деректерді талдауға қажет. Сондықтан жасанды интеллектіні қолдану айтарлықтай қаржылық ресурстарды және оның нақты бизнеске қаншалықты қажет екенін түсінуді талап етеді», — деп қорытындылады ол.
Демек AI енгізудің өзі тиімділіктің кепілі емес. Технологияға жұмсалатын инвестиция автоматтандырылатын операциялардың ауқымы жеткілікті болған жағдайда ғана өзін ақтайды.
Сақтандыру AI үшін тәжірибе алаңына айналып келеді
Сақтандыру бизнесінің AI үшін маңызды артықшылығы бар: мұнда күн сайын қайталанатын операциялар көп және үлкен көлемде дерек жинақталады.
Клиенттің өтініші, автокөліктің фотосуреттері, сақтандыру жағдайларының тарихы, спутниктік деректер және қоңыраулар жазбасы алгоритмдер талдай алатын ақпаратқа айналады.
Сондықтан AI сақтандыруда клиентке жауап беретін көмекші деңгейінен нақты қаржылық шешім қабылдайтын құрал деңгейіне өтіп жатыр.
Бұған дейін біз жасанды интеллект, автоматты скоринг және спутниктік деректер Қазақстандағы сақтандыру нарығын қалай өзгертіп жатқанын талдаған едік. Енді Freedom Insurance келесі межені белгілеп отыр: 2027 жылы сақтандыру төлемдерінің 60%-ына дейінін AI-агент адамның қатысуынсыз реттеуі тиіс.
