Қонаевта 550-ден астам сарбаз әскери ант қабылдады

553
Анастасия Ким Редактор
Фотосурет: Қонаев гарнизонының баспасөз қызметі

Қонаевта 550-ден астам жас сарбаз әскери ант қабылдады. 35-ші жеке гвардиялық десанттық-шабуылдау бригадасының әскери қызметшілері үшін бұл күн әскердегі жаңа кезеңнің бастауы болды. Ал ата-аналар ұлдарының қандай жағдайда тұрып, әскери дайындықтан өтетінін өз көздерімен көрді, деп хабарлайды DKNews.kz.

Салтанатты рәсім Қонаев гарнизонындағы 32363 әскери бөлімінің саптық алаңында өтті. Әскери антты күзгі шақырылымда әскер қатарына қосылып, жас жауынгер курсынан өткен сарбаздар қабылдады.

Іс-шараға облыс әкімінің бірінші орынбасары Қанат Есболатов, Қонаев қаласының әкімі Асхат Бердіханов, Десанттық-шабуылдау әскерлері қолбасшысының жауынгерлік даярлық жөніндегі орынбасары полковник Ұлан Нұрғазиев, Қарулы күштердің ардагерлері мен сарбаздардың туған-туыстары қатысты.

550-ден астам сарбаз алғашқы әскери дайындықтан өтті

Жас десантшылар үшін әскери ант қабылдау әскер өмірімен танысу кезеңінің аяқталып, қызметтің келесі сатысына өткенін білдіреді.

Салтанатты рәсімге дейін сарбаздар саптық және атыс даярлығының негіздерін меңгерді. Қару-жарақ пен әскери техниканың тактикалық-техникалық сипаттамаларын зерттеп, әскери бөлімнің тарихы мен дәстүрлерімен танысты.

Сондай-ақ мемлекеттік-құқықтық даярлықтан өтіп, әскери тәртіп талаптарын үйренді.

Сап алдында тұрған жас жауынгерлер Қазақстан халқына адал болуға, елдің тәуелсіздігі мен аумақтық тұтастығын қорғауға және әскери борышын абыроймен атқаруға ант берді.

Десанттық-шабуылдау әскерлері қолбасшысының жауынгерлік даярлық жөніндегі орынбасары полковник Ұлан Нұрғазиев сарбаздардың әскери дәстүрі қалыптасқан ерекше құрамда қызмет ететінін айтты.

«Әскери ант қабылдау – әрбір әскери қызметшінің өміріндегі маңызды әрі жауапты кезең. Бүгіннен бастап сіздер Отанға абыроймен қызмет етуге, білімдеріңіз бен дағдыларыңызды үнемі жетілдіруге, әскери тәртіпті сақтауға және қызмет барысында кездесетін барлық қиындықты лайықты еңсеруге міндеттеме аласыздар. 35-ші жеке гвардиялық десанттық-шабуылдау бригадасы – Қазақстанның Десанттық-шабуылдау әскерлерінің бесігі. Мұнда сіздер қажетті білім алып, мінездеріңізді шыңдайсыздар, жауынгерлік тәжірибе жинақтап, қаруластарыңызбен иық тіресе әрекет етуді үйренесіздер. Әрқайсыңыз өздеріңізге артылған сенімді ақтап, Отанның лайықты қорғаушысы болатыныңызға сенімдімін!»

– деді полковник Ұлан Нұрғазиев.

Он баланың әкесі ұлының антын көру үшін Ақтөбеден келді

Салтанатты шараға арнайы келгендердің бірі – Дәурен Ботабасов. Ол 32363 әскери бөлімінде мерзімді әскери қызметін өтеп жүрген үлкен ұлы, гвардия қатардағы жауынгері Мансур Жақсылықты қолдау үшін Ақтөбеден жеткен.

Бұл отбасы үшін әскери қызметтің мәні ерекше. Дәурен Ботабасовтың өзі 1996 жылы тәжік-ауған шекарасында әскери борышын өтеген.

Арада 30 жыл өткенде ол әскери сап алаңына сарбаз ретінде емес, ұлының болашағына алаңдаған әрі оны мақтан тұтқан әке ретінде келді.

«Мен он баланың әкесімін, Ақтөбеден арнайы келдім. Бүгін үлкен ұлым әскери ант қабылдап жатыр. Бұл – біздің отбасымыз үшін өте маңызды әрі толқынысқа толы күн. Өзім 1996 жылы тәжік-ауған шекарасында әскери қызмет атқардым. Сондықтан әскери борыш пен сарбаз абыройының не екенін жақсы білемін. Барлық жас сарбазға әскери қызметін лайықты атқарып, Отанның нағыз қорғаушысы болуды тілеймін. Балаларымыз елге аман-есен, шыңдалып, әскери борышын абыроймен өтеп оралсын. Мен қазақстандық жастарға сенемін және ұлымды мақтан тұтамын!»

– деді Дәурен Ботабасов.

Ата-аналарға казарма, асхана және әскери техника көрсетілді

Ресми рәсім аяқталған соң сарбаздардың отбасылары әскери бөлімнің күнделікті тыныс-тіршілігімен танысты.

Қонақтарға бригада аумағында экскурсия ұйымдастырылды. Ата-аналарға сарбаздар тұратын казармалар, оқу сыныптары, асхана, қару-жарақ үлгілері мен әскери техника көрсетілді.

Осылайша олар ұлдарының қай жерде тұратынын, қалай тамақтанатынын және қандай жағдайда әскери дайындықтан өтетінін өз көздерімен көруге мүмкіндік алды.

Ата-аналар әскери бөлім өкілдеріне көкейдегі сұрақтарын қойып, командирлердің байланыс деректерін де алды.

Әсіресе балалары туған жерінен жырақта қызмет етіп жүрген отбасылар үшін бұл кездесудің мәні зор болды. Олар әскердегі жағдайды тек ұлдарының әңгімесінен естіп қана қоймай, әскери өмірдің бір бөлігін тікелей көрді.

Десантшылар қоян-қолтық ұрыс тәсілдерін көрсетті

Әскери ант қабылдау рәсімі салтанатты сап түзеумен ғана шектелген жоқ.

Десантшылар қонақтарға қоян-қолтық ұрыс тәсілдерін көрсетіп, қарумен және қарусыз орындалатын саптық дайындық элементтерін таныстырды.

Көрсетілім барысында ата-аналар әскери қызметшілердің дайындық кезінде меңгеретін жекелеген дағдыларын тамашалады.

35-ші жеке гвардиялық десанттық-шабуылдау бригадасы Қазақстанның Десанттық-шабуылдау әскерлері тарихында айрықша орын алады. Полковник Ұлан Нұрғазиев атап өткендей, бұл әскери құрама еліміздегі десанттық-шабуылдау әскерлерінің бесігі саналады.

Ант қабылдаған сарбаздар алғаш рет үйлеріне шығуға рұқсат алды

Салтанатты күн жас сарбаздар мен олардың жақындары асыға күткен сәтпен аяқталды.

Әскери ант қабылдағаннан кейін сарбаздарға алғаш рет әскери бөлім аумағынан шығуға рұқсат берілді. Олар туған-туыстарымен бірге уақыт өткізуге мүмкіндік алды.

Алдағы уақытта жас десантшылар әскери даярлығын жалғастырып, қажетті жауынгерлік дағдыларды меңгереді және қызмет барысында жүктелген міндеттерді орындайды.

Бұл күн 550-ден астам сарбаздың өмірінде ерекше естелік болып қалмақ. Бірі үшін әскери ант Отан алдындағы жауапкершіліктің бастауы болса, енді бірі үшін алыстан арнайы келген ата-анасымен қауышу қуанышы болды.

«DKnews.kz» халықаралық ақпараттық агенттігі Қазақстан Республикасының Мәдениет және ақпарат министрлігінде тіркелген. Есепке қою туралы куәлік № 10484-АА 2010 жылдың 20 қаңтарында берілді.

Тақырып
Жаңарту
МИА «DKnews.kz» © 2006 -