Беларусь ШЫҰ қызметінің барлық салаларындағы қатысуын барынша арттырды. Бұл туралы Беларусь Сыртқы істер министрінің бірінші орынбасары Сергей Лукашевич мәлімдеді, деп хабарлайды Xinhua.
С.Лукашевичтің айтуынша, Беларусь ШЫҰ министрліктері мен ведомстволары басшыларының 25 отырысына және жұмыс топтары деңгейіндегі 26 кеңеске қатысуын қамтамасыз етті. Шенеунік сондай-ақ 2025 жылдың 5 маусымында «Беларусбанк» ААҚ ШЫҰ Банкаралық бірлестігіне мүше банк ретінде қабылданғанын атап өтті. Ағымдағы жылдың мамыр айында ШЫҰ университетінің қызметіне алты Беларусь университеті қосылды.
"Соңғы бір жылда Беларусь ШЫҰ қызметінің барлық салаларында өзінің қатысуын барынша арттыра алды және еш кідіріссіз жұмысқа белсенді түрде қосыла алды. Біз ШЫҰ аясында Беларусь өзінің стратегиялық басымдықтарын жүзеге асыра алатынын, көп қырлы ынтымақтастықты дамытуға және ортақ жобаларға үлес қоса алатынын көрдік", - деді С.Лукашевич. Сондай-ақ Беларусь Тяньцзиньдегі ШЫҰ саммитінің қорытындысы бойынша ұйымның институционалдық әлеуетін күшейтетін шешімдер қабылданатынына сенім білдірді. Ең алдымен, трансшекаралық сын-қатерлерге: терроризмге, киберқауіптерге, есірткі трафигіне қарсы бірлесіп күресу саласында. "Экономикалық салада біз кедендік рәсімдерді жеңілдету, өзара инвестицияларды ынталандыру, цифрлық экономика мен көлік өзара байланысын дамыту, жасыл энергетиканы қолдау бойынша бастамаларды ілгерілетуге үміттенеміз. Біз сондай-ақ гуманитарлық алмасуды кеңейту бойынша жұмыс істеуге дайынбыз. Бұл бағыттардың барлығы Беларусь үшін өте маңызды", - деп түйіндеді сөзін С.Лукашевич.
