Қытайдың оңтүстігіндегі Гуандун провинциясының Гуанчжоу қаласында сейсенбі күні Азия–Тынық мұхиты экономикалық ынтымақтастығы (АТЭС)–2026 аясындағы жоғары лауазымды тұлғалардың алғашқы кездесуінің ашылу салтанаты өтті, деп хабарлайды Xinhua.
Қытай тарапы биыл өтетін АТЭС көшбасшыларының бейресми кездесуінде бағыты айқын әрі мазмұны бай қорытынды құжаттың қабылдануына жәрдемдесетін болады. Бұл туралы Қытайдың сыртқы істер министрі Ван И Гуанчжоуда өткен АТЭС-2026 жоғары лауазымды тұлғаларының алғашқы кездесуінің ашылуында сөйлеген сөзінде мәлімдеді.
Қытай Коммунистік партиясы Орталық комитеті Саяси бюросының мүшесі болып табылатын Ван И Қытайдың Азия–Тынық мұхиты өңірінде еркін сауда аймағын құру жолдарын белсенді түрде кеңейтіп, көлік саласындағы өзара байланыстарды нығайту жөніндегі жоспарды ілгерілететінін атап өтті.
Оның айтуынша, Қытай тарапы инновациялар арқылы АТЭС мүшелерінің цифрлық, зияткерлік және экологиялық трансформациясына қолдау көрсетіп, даму саласындағы басқаруға қатысты түрлі бағыттарда практикалық ынтымақтастықты тереңдетуге күш салады.
