Қытайда электр көліктеріне арналған зарядтау инфрақұрылымы қарқынды дамуын жалғастыруда. Биылғы жылдың ақпан айының соңына қарай мұндай құрылғылардың жалпы саны 21,01 млн бірлікке жетіп, жылдық есепте 47,8 пайызға артты, деп хабарлайды Xinhua.
Бұл туралы Қытайдың Мемлекеттік энергетика басқармасы жариялаған деректерде айтылды.
Олардың ішінде қоғамдық пайдалануға арналған зарядтау құрылғыларының саны 4,834 млн бірлікті құрап, бір жыл ішінде 28,8 пайызға өсті.
Ал жеке пайдалануға арналған зарядтау құрылғыларының саны 16,176 млн бірлікке жетіп, жылдық есепте 54,6 пайызға артты. Бұл халық арасында электр көліктеріне сұраныстың айтарлықтай өсіп отырғанын көрсетеді.
Ұлттық зарядтау инфрақұрылымын мониторингтеу және қызмет көрсету платформасында жарияланған бұл деректер Қытайда электр көліктерін қолдау жүйесінің кеңейіп келе жатқанын айқындайды. Бұл үрдіс мұндай көлік түрлерінің сатылымының күрт өсуімен қатар жүріп отыр.
Қытай автомобиль өндірушілер қауымдастығының мәліметінше, 2025 жылы жаңа энергия көздеріне негізделген көліктердің өндірісі мен сатылымы сәйкесінше 16,626 млн және 16,49 млн бірлікті құрап, жылдық есепте 29 пайызға және 28,2 пайызға артты.
2025 жылдың қазан айында Қытай 2027 жылдың соңына дейін жалпы қуаты 300 млн кВт-тан асатын 28 млн зарядтау құрылғысынан тұратын ұлттық желі құруды көздейтін үш жылдық іс-қимыл жоспарын жариялады.
