Қытайдағы екі паркке «ЮНЕСКО-ның жаһандық геопаркі» мәртебесі берілді, осылайша елдегі мұндай геопарктердің саны 51-ге жетті. Бұл туралы сәрсенбі күні Қытай Халық Республикасының Орман және дала шаруашылығы жөніндегі мемлекеттік басқармасы мәлімдеді.
Шешім Парижде өткен ЮНЕСКО Атқарушы кеңесінің 224-ші сессиясында қабылданды. Тізімге Чжэцзян провинциясындағы Чаншань геопаркі және Сычуань провинциясындағы Сыгунян таулары геопаркі енгізілді. Аумағы 1 043,1 шаршы километрді құрайтын Чаншань геопаркі кембрий кезеңінен ордовик кезеңіне дейінгі жақсы сақталған стратиграфиялық қабаттарымен және бай палеонтологиялық қазба қалдықтарымен ерекшеленеді.
Аумағы 2 764,01 шаршы километр болатын Сыгунян таулары геопаркі Цинхай-Тибет үстірті мен Сычуань ойпаты арасындағы өтпелі аймақта орналасқан. Мұнда күрделі қатпарлы құрылымдарды, флиш шөгінділерін, аса биік таулар мен гранитті шыңдарды көруге болады.
Осы шешімді ескере отырып, Қытайда қазіргі уақытта 24 провинцияда, автономиялық аудандарда, орталыққа тікелей бағынатын қалаларда және Сянган арнайы әкімшілік ауданында орналасқан 51 ЮНЕСКО-ның жаһандық геопаркі бар.
