Жуырда Солтүстік Қытайдағы Ішкі Моңғолия автономиялық ауданындағы пилоттық еркін сауда аймағының Эрэн-Хото бөлігінде Қаржылық сервис көрсету демонстрациялық орталығы құрылды. Бұл туралы дүйсенбі күні Эрэн-Хото қаласы үкіметінің ресми сайтында жарияланған хабарламада айтылды.
Аталған еркін сауда аймағының Эрэн-Хото бөлігі 2026 жылдың сәуір айында құрылып, оның жоспарланған аумағы 18,35 шаршы шақырымды құрайды. Бұл аумақта халықаралық сауда, халықаралық логистика, трансшекаралық туризм және халықаралық медициналық қызмет көрсету секілді салаларды дамытуға басымдық беріледі. Болашақта өңірді Қытай–Моңғолия–Ресей экономикалық дәлізіндегі маңызды торапқа және көршілес елдермен достық ынтымақтастықтың үлгісіне айналдыру жоспарланған.
Эрэн-Хото қаласында Қаржылық сервис көрсету демонстрациялық орталығының ашылуы пилоттық еркін сауда аймағындағы қаржылық қызмет жүйесін жетілдіруге, қаржылық қолдау мүмкіндіктерін нығайтуға және Эрэн-Хото шекара өткелінің солтүстік бағыттағы ашықтығы мен жоғары сапалы дамуына жағдай жасауға мүмкіндік береді.
Еркін сауда аймағының Эрэн-Хото бөлігінде трансшекаралық сауда-экономикалық операциялардың дамуы аясында өңірдегі қаржы мекемелерінің жетіспеушілігі барған сайын айқын сезілуде. Бұл жағдай трансшекаралық сауда мен инвестициялардың дамуына кері әсерін тигізіп отыр. Жаңа орталық аймақтық қаржылық қызметтер саласындағы олқылықтың орнын толтырып, сыртқы сауда кәсіпорындарының қажеттіліктерін қанағаттандыруға бағытталған.
Мәліметтерге сәйкес, орталық сапалы қаржылық ресурстарды біріктіріп, үкімет, банктер және кәсіпорындар арасындағы өзара іс-қимылға арналған бірыңғай сервистік платформа қалыптастырады. Сонымен қатар қаржылық қызмет көрсету үдерісі жетілдіріліп, трансшекаралық қаржы, шекаралық сауданы қаржыландыру және трансшекаралық төлемдер сияқты сервистік өнімдер іске қосылады.
Орталық кәсіпорындарға қаржыландыру мәселелерін шешуге, қаржылық қызметтерге қол жеткізу барысындағы күрделі рәсімдерден туындайтын қиындықтарды еңсеруге көмектеседі. Сондай-ақ ол қаржылық қызметтердің сапасы мен тиімділігін жан-жақты арттырып, экономиканың нақты секторын тұрақты дамытуға ықпал етеді.
