Қытай үкіметі 2030 жылдың соңына қарай ел қалаларындағы тұрмыстық қалдықтарды қайта өңдеу деңгейін 76 пайыздан жоғары деңгейге жеткізу міндетін қойды. Бұл туралы дүйсенбі күні ҚХР Тұрғын үй, қала және ауыл құрылысы министрлігінде хабарланды.
Мәлімдеме 25–31 мамыр аралығында өтетін қалалардағы тұрмыстық қалдықтарды сұрыптауды насихаттауға арналған төртінші жалпыұлттық апталыққа орай ұйымдастырылған жұмыс кеңесінде жасалды.
Биыл министрлік қалдықтарды сұрыптау және көлемін азайту, оларды ұтымды пайдалану мен қайта өңдеу бағытындағы негізгі мақсаттарға қол жеткізу жұмыстарын жалғастырады. Сонымен қатар мемлекеттік шаралар жүйесін жетілдіру және қайта өңделетін шикізатты басқаруды күшейту бойынша тұрақты жұмыстар жүргізілуде.
Министрліктің ресми өкілінің айтуынша, бұл шаралар қалдықтарды қайта өңдеу деңгейін арттыруға бағытталған. Өз кезегінде бұл қалалардың сапалы дамуына және «Әсем Қытай» тұжырымдамасын қалыптастыруға ықпал етеді.
Оның сөзінше, соңғы он жыл ішінде министрлік пилоттық бағдарламалар мен үлгілік жобаларды іске асыру арқылы қалдықтарды сұрыптау саласында тұрақты прогреске қол жеткізген.
Қазіргі уақытта қалдықтарды сұрыптау жұмыстары округ деңгейіндегі және одан жоғары 297 қаланың іс жүзінде барлық шағын аудандарын қамтиды. Аталған қалаларда қалдықтарды сұрыптауға қатысты 199 жергілікті нормативтік акті мен ереже қабылданып, 100-ден астам техникалық стандарт жарияланған.
Министрлік мәліметінше, өткен жылдың соңына қарай елде тәулігіне жалпы қуаты 1,18 млн тоннаға жететін 1137 қоқыс жағу кәсіпорны жұмыс істеген. Сонымен қатар Бейжің, Чжэцзян және Шаньдунды қоса алғанда, Қытайдың провинциялық деңгейдегі 15 әкімшілік бірлігінде бастапқы тұрмыстық қалдықтарды көму толық тоқтатылған. Бұл өңірлер негізгі ластаушы заттардың шығарындыларын бақылау бойынша әлемдік озық деңгейге жеткен.
