Қытайдың екі жетекші университеті академиялық құқықбұзушылықтарға қатысты нөлдік төзімділік қағидатына берік екенін тағы бір мәрте растап, бірнеше қызметкеріне тәртіптік жаза қолданды.
Тяньцзинь қаласындағы Нанькай университеті жариялаған ресми хабарламада ғылыми зерттеулерінде бұзушылықтар анықталған постдокторантпен еңбек шартының бұзылғаны айтылды. Сонымен қатар ғылыми мақаланың екі жауапты авторының бірі Нанькай университетінің Өмір туралы ғылымдар институтының директоры қызметінен босатылды, ал екіншісіне ескерту жасалды.
Университет мәлімдемесінде бұл жағдайдан сабақ алынып, академиялық адалдық мәдениетін жан-жақты нығайту жұмыстары күшейтілетіні атап көрсетілген. Мұндай шаралар құқықбұзушылықтардың алдын алуға, таза әрі адал ғылыми-зерттеу ортасы мен академиялық ахуалды қалыптастыруға бағытталған.
Өз кезегінде Қытайдың оңтүстігіндегі Гуандун провинциясында орналасқан Сунь Ятсен университеті ғылыми мақалаларында академиялық бұзушылық белгілері анықталған екі зерттеушіні — Ұлттық жетекші зертхана басшысының орынбасары мен институт басшысының орынбасарын қызметінен босатты.
Оқиғаға қатысы бар басқа тұлғалар да жауапкершілікке тартылып, оларға қызметін төмендетуден бастап ескерту жасауға дейінгі түрлі тәртіптік жазалар қолданылды.
Университет мәлімдемесінде академиялық құқықбұзушылықтарға қатысты нөлдік төзімділік саясатын қатаң ұстанудың маңыздылығы атап өтілді. Сондай-ақ академиялық адалдықты қамтамасыз ету, ғылыми зерттеулердің барлық кезеңдеріндегі басқару тетіктерін жетілдіру және тұрақты бақылау мен тексеру жүйесін дамыту бойынша жұмыстарды күшейту қажеттігі айтылды.
