Өзбекстанның мобильді байланыс операторы Ucell мен Қытайдың ZTE корпорациясы Өзбекстанның телекоммуникациялық желісінде ZTE әзірлеген жасанды интеллект (ЖИ) негізіндегі энергияны үнемдейтін «жасыл» желілік шешімді ауқымды коммерциялық пайдалануға енгізуді аяқтағанын жариялады.
Енгізілген жүйе желінің ағымдағы жүктемесіне қарай энергия тұтынуды динамикалық түрде оңтайландыру үшін жасанды интеллект технологияларын пайдаланады. Базалық станциялар мен ұяшықтар деңгейінде шешім трафик азайған кезеңдерде энергия үнемдеу режимдерін автоматты түрде іске қосып, қызмет көрсетудің үздіксіздігі мен байланыс сапасының тұрақтылығын қамтамасыз етеді.
Компаниялардың мәліметінше, желінің энергия тиімділігі 10,6 пайызға артқан. Жаңғырту бұрынғы энергия тұтыну деңгейін сақтай отырып, деректердің анағұрлым үлкен көлемін тасымалдауға мүмкіндік береді. Бұл операциялық шығындар мен көміртек ізін азайтуға ықпал етеді.
Ucell компаниясының бас директоры Андрей Шишковскийдің айтуынша, бұл жоба цифрлық трансформацияны экологиялық жауапкершілікпен ұштастыруға мүмкіндік береді. Оның сөзінше, интеллектуалды шешімді енгізу көміртек ізін қысқарту және операциялық тиімділікті арттыру жолындағы маңызды қадам болды әрі қазірдің өзінде бизнес пен қоршаған орта үшін нақты пайда әкелуде.
