Қытай 2030 жылға қарай экологиялық таза, төмен көміртекті, қауіпсіз әрі тиімді жаңа энергетикалық жүйені негізінен қалыптастыруды жоспарлап отыр. Бұл мақсат Қытайдың Мемлекеттік даму және реформалар комитеті мен Мемлекеттік энергетика басқармасы бірлесіп жариялаған 15-бесжылдық кезеңіне (2026–2030 жылдар) арналған жоспарда бекітілген.
Құжатта энергетика саласын дамытудың негізгі бағыттары айқындалған. Олардың қатарында энергетикалық қауіпсіздікті нығайту, «жасыл» трансформацияны жеделдету, технологиялық дербестікті арттыру және нарықтық тетіктерді жетілдіру бар.
Жоспарға сәйкес, 2030 жылға қарай Қытайдың жиынтық энергетикалық қуаты көмір эквивалентімен есептегенде 5,8 млрд тоннаға жетуі тиіс. Сонымен қатар жаңартылатын энергетиканың рөлі айтарлықтай артады: қазба отындарына жатпайтын энергия көздерінің жалпы энергия тұтынудағы үлесі 25 пайызға дейін өседі, ал жел және күн электр станциялары елдің белгіленген генерациялау қуатының жартысынан астамын қамтамасыз етеді.
Сондай-ақ жоспарға сәйкес, онжылдықтың соңына қарай қазба отындарына жатпайтын энергия көздері Қытайдағы электр энергиясының шамамен 50 пайызын өндіріп, негізгі электр энергиясы көзіне айналады.
Құжатта отандық технологиялар мен жабдықтарды дамытуға ерекше назар аударылған. Онда энергетика саласының технологиялық тәуелсіздігін жоғары деңгейде қамтамасыз ету және Қытайды энергетикалық инновациялар саласындағы әлемдік көшбасшылардың қатарына шығару міндеті қойылған.
Бұдан бөлек, электр энергиясының бірыңғай ұлттық нарығын жедел қалыптастыру және жаңа энергетикалық құрылымға сәйкес келетін баға белгілеу жүйесін жетілдіру көзделген. Жоспарда дәстүрлі энергия ресурстарын пайдалануды одан әрі оңтайландыру, инфрақұрылымды дамыту, энергия тасымалдаушылар импортының бағыттарын әртараптандыру және бүкіл энергетикалық жүйенің орнықтылығын арттыру шаралары да қарастырылған.
Бұл шаралар Қытайдың стратегиялық климаттық мақсаттарына – 2030 жылға қарай көмірқышқыл газы шығарындыларының ең жоғары деңгейіне жету және 2060 жылға қарай көміртектік бейтараптыққа қол жеткізу міндеттерін орындауға бағытталған. Қазіргі уақытта Қытай әлемдегі ең ірі жаңартылатын энергетика жүйесіне ие және ол қарқынды түрде кеңейіп келеді.
