Қытай экономикасы 2026 жылдың бірінші жартыжылдығында тұрақты өсімін сақтап, әлемдік экономиканың негізгі қозғаушы күштерінің бірі ретіндегі орнын нығайтты. Ресми мәліметтерге сәйкес, елдің жалпы ішкі өнімі 4,7 пайызға өсіп, 2026–2030 жылдарға арналған 15-бесжылдық жоспарының алғашқы жылына белгіленген мақсатты көрсеткіштерге сәйкес келді. Жыл қорытындысы бойынша Қытай экономиканың 4,5–5 пайыз аралығында өсуін қамтамасыз етуді көздеп отыр.
Жылдың алғашқы алты айында сыртқы сауда, жоғары технологиялық өндіріс, цифрлық экономика және заманауи қызмет көрсету саласы тұрақты қарқынмен дамыды. Экономикалық өсімнің 40 пайыздан астамын жаңа салалар қамтамасыз етті. Дүниежүзілік банктің бағалауынша, Қытай экономикасының тұрақтылығы жоғары технологияларға салынған ауқымды инвестициялармен, инновациялардың дамуымен және энергетикалық қауіпсіздікті нығайтуға бағытталған шаралармен қамтамасыз етіліп отыр.
Қытай экономиканың «жасыл» трансформациясын да жеделдетуді жалғастыруда. Елдің энергетикалық жүйесіндегі белгіленген қуаттың жалпы көлемінде қазба отынына жатпайтын энергия көздерінің үлесі 62 пайызға жетіп, энергетикалық қауіпсіздікті нығайтуға және сыртқы факторларға тәуелділікті азайтуға ықпал етуде.
Әлемдік экономикадағы тұрақсыздыққа қарамастан, Қытай ашықтық саясатын кеңейтуді жалғастырып келеді. 2026 жылғы 1 мамырдан бастап ел Қытаймен дипломатиялық қарым-қатынасы бар барлық Африка мемлекеттеріне нөлдік импорттық баж салығы режимін енгізді. Сонымен қатар бірінші жартыжылдықта импорттың өсу қарқыны экспорттың өсімінен 8,7 пайыздық тармаққа жоғары болды.
Шетелдік инвестициялар көлемі де артып келеді. Жылдың алғашқы бес айында Қытайда шетелдік капиталдың қатысуымен 25 297 жаңа кәсіпорын тіркелді, бұл өткен жылдың сәйкес кезеңімен салыстырғанда 5,3 пайызға көп. Сонымен бірге 4 мыңға жуық шетелдік компания Қытай нарығындағы қызмет аясын кеңейтті.
Ел билігі ішкі сұранысты ынталандыруға да ерекше мән беруде. Жақында жарияланған жоспарға сәйкес, 2030 жылға қарай тұтыну тауарларының бөлшек сауда көлемі шамамен 60 трлн юаньға (8,84 трлн АҚШ доллары) жетуі тиіс. Бұл Қытайдың тұтыну нарығының зор әлеуетін көрсетеді.
Қытай алдағы уақытта да ашық экономиканы дамытуға, халықаралық ынтымақтастықты нығайтуға, жаһандық жеткізу тізбектерінің тұрақтылығын қолдауға және өзара тиімді дамуға жаңа мүмкіндіктер жасауға дайын екенін растады. Осы тұрғыда технологиялық инновацияларға, ашықтыққа және экономиканы жаңғыртуға негізделген «Қытай мүмкіндіктері 2.0» тұжырымдамасы шетелдік инвесторлар мен халықаралық бизнес үшін барған сайын маңызды бола түсуде.
