Әлемдік экономикадағы тұрақсыздыққа, геосаяси шиеленістер мен сауда шектеулеріне қарамастан, Қытай экономикасы 2026 жылдың бірінші жартыжылдығында тұрақты өсу қарқынын сақтап қалды. Қытайдың Мемлекеттік статистика басқармасының мәліметіне сәйкес, қаңтар–маусым айларында елдің жалпы ішкі өнімі (ЖІӨ) өткен жылдың сәйкес кезеңімен салыстырғанда 4,7 пайызға өсті. Екінші тоқсандағы өсім 4,3 пайызды құрады.
Мемлекеттік статистика басқармасы басшысының орынбасары Мао Шэнъюннің айтуынша, қол жеткізілген нәтижелер үкімет белгілеген жылдық 4,5–5 пайыздық экономикалық өсім мақсатына сәйкес келеді. Оның сөзінше, екінші тоқсандағы өсімнің баяулауы негізінен сыртқы факторларға байланысты уақытша құбылыс болды, ал Қытай экономикасының іргелі негіздері берік күйінде қалып отыр.
Жылдың алғашқы алты айында қалалардағы жұмыссыздық деңгейі 5 пайызға дейін төмендеді, халықтың жан басына шаққандағы қолдағы табысы 5,2 пайызға өсті, өнеркәсіп өндірісі 5,4 пайызға артты, ал тауарлар мен қызметтердің бөлшек сауда көлемі 2,7 пайызға ұлғайды.
Экономикалық өсімнің негізгі қозғаушы күштерінің бірі жоғары технологиялық салалар болды. Статистикалық ведомствоның мәліметінше, жоғары технологиялық өндіріс, цифрлық экономика және заманауи қызмет көрсету салалары елдің жалпы экономикалық өсімінің 40 пайыздан астамын қамтамасыз етті. Сонымен қатар ЖІӨ бірлігіне шаққандағы энергия тұтыну 1,9 пайызға төмендеп, экономиканың энергия тиімділігі артып келе жатқанын көрсетті.
Өнеркәсіпті жаңғырту жұмыстары да жалғасуда. Жақында Дүниежүзілік экономикалық форум озық өндірістік технологияларды енгізудің үлгісі ретінде таныған 16 жаңа «маяк-зауыттың» жартысынан астамы Қытайда орналасқан. Олар кеме жасау, зияткерлік логистика және жоғары технологиялық өндіріс салаларында жұмыс істейді.
Қызмет көрсету секторы да экономикалық өсімнің басты драйверлерінің бірі ретіндегі орнын нығайтты. Қаңтар–маусым айларында бұл саланың қосылған құны 5,2 пайызға өсіп, жалпы экономикалық өсім қарқынынан жоғары болды.
Сарапшылар Қытай экономикасының тұрақтылығын елдің дамыған өнеркәсіптік базасымен, ауқымды ішкі нарығымен және тиімді мемлекеттік макроэкономикалық саясатымен байланыстырады. 15-бесжылдық (2026–2030 жылдар) аясында Қытай жоғары сапалы өндірісті, цифрлық экономиканы, жаңа өндіргіш күштерді дамытуға және ішкі сұранысты кеңейтуге басымдық беруде.
Бұл бағыттағы маңызды қадамдардың бірі ретінде ел тарихындағы тұтынуды ынталандыруға толықтай арналған алғашқы бесжылдық жоспар қабылданды. Құжат ішкі нарықтың әлеуетін толық пайдалануға, тұтыну құрылымын жетілдіруге және халықтың өмір сүру деңгейін арттыруға бағытталған кешенді шараларды қамтиды.
Халықаралық валюта қоры биыл Қытай экономикасының өсу болжамын жақында қайта жоғарылатты. Ұйымның бағалауынша, әлемдегі екінші ірі экономиканың тұрақтылығы жаһандық экономиканың орнықтылығын қамтамасыз ететін маңызды факторлардың бірі болып қала береді. Экономистер жылдың екінші жартысында мемлекеттік қолдау шараларының әсері күшейіп, жаңа экономикалық саясат құралдары тұрақты өсімді сақтауға және жылдық мақсаттарға қол жеткізуге мүмкіндік береді деп күтуде.
