WAIC 2026 Жасанды интеллект жөніндегі дүниежүзілік конференциясы және ЖИ-ді жаһандық басқару мәселелері жөніндегі жоғары деңгейдегі кеңес жасанды интеллекттің технологиялық демонстрациялар кезеңінен кең ауқымды практикалық қолдану кезеңіне өткенін көрсетті. Сарапшылар бүгінде әлемдік ЖИ индустриясының дамуын айқындайтын бес негізгі үрдісті атап өтті.
1. Есептеу инфрақұрылымын дамыту бәсекелестіктің басты факторына айналуда
Биыл WAIC көрмесінің алаңы алғаш рет 100 мың шаршы метрден асты. Оған 1100-ден астам компания қатысып, 3000-нан астам экспонатты, соның ішінде 300-ден астам әлемдік премьераны ұсынды. Негізгі бағыттардың бірі жаңа буын есептеу инфрақұрылымы болды. Huawei агенттік жасанды интеллектпен жұмыс істеуге арналған Atlas 950 SuperPoD суперторабын таныстырса, Sugon ғылыми зерттеулерге арналған ЖИ мүмкіндіктері бар елдегі ең ірі суперкомпьютерлік кластерлердің бірін ұсынды. Форум қатысушыларының пікірінше, бәсекелестік енді жекелеген модельдер мен процессорлардан толыққанды есептеу экожүйесін қалыптастыруға қарай ауысуда.
2. Бағдарламалық қамтамасыз ету мен құрылғылардың бірігуі ЖИ-ді күнделікті өмірдің бір бөлігіне айналдыруда
WAIC көрмесінде жасанды интеллект енді тек бағдарламалық өнім ретінде емес, толыққанды тұтынушылық өнім ретінде кеңінен таныстырылды.
Жаңалықтардың қатарында интеллектуалды көзілдіріктер, жеке көмекші роботтар, музыкалық аспаптар және жасанды интеллекті бар ойыншықтар болды. Көпшіліктің ерекше қызығушылығын иесінің әдеттерін есте сақтап, оның көңіл күйіне бейімделе алатын «Фуцзай» интерактивті ойыншығы тудырды. Шанхай билігі 2027 жылға қарай ЖИ негізіндегі интеллектуалды терминалдар өндірісінің көлемі 300 млрд юаньнан асады деп күтеді.
3. Жасанды интеллект өнеркәсіпке белсенді түрде енгізілуде
Жасанды интеллект өндіріс, энергетика, көлік және медицина салаларына қарқынды енгізілуде. YobiAI компаниясы өндірістік қауіпсіздікті қамтамасыз ететін интеллектуалды жүйені таныстырды. Ол қызметкерге қауіп төнген жағдайда жабдықты 60–80 миллисекунд ішінде автоматты түрде тоқтата алады. Ал AGIBOT компаниясы Гуанчжоу метросының станцияларында жолаушыларға қызмет көрсету және тексеру жұмыстарын өздігінен орындайтын Genie G2 гуманоид роботын көрсетті. WAIC көрмесі кезінде осы компанияның 60 сервистік роботы келушілерге қызмет көрсетті. Қазіргі уақытта Қытайда жасанды интеллектті енгізуге арналған 30-дан астам ұлттық пилоттық алаң құрылған. Ірі өнеркәсіптік кәсіпорындарда ЖИ қолдану деңгейі 30 пайыздан асты.
4. Стартаптар мен жас әзірлеушілер саланың жаңа қозғаушы күшіне айналуда
WAIC 2026 конференциясының басты ерекшеліктерінің бірі жас кәсіпкерлер мен тәуелсіз әзірлеушілердің белсенді қатысуы болды. WAIC Future Tech бағдарламасы аясында инвесторлар әлемнің түкпір-түкпірінен түскен 1200-ден астам өтінімнің ішінен 180-ге жуық перспективалы жобаны іріктеп алды.Командалардың 70 пайыздан астамы үш жылдан аз уақыт бұрын құрылған, ал олардың негізін қалаушылардың жартысынан көбі 1990-жылдары дүниеге келген. Бағдарлама қорытындысында жалпы құны 268 млн юань болатын алдын ала келісімдер мен тапсырыстар жасалып, бұл жас компанияларға елеулі қолдау болды.
5. Жасанды интеллект саласындағы халықаралық ынтымақтастық жаңа деңгейге көтерілуде
Конференция ірі салалық көрме ғана емес, сонымен қатар жасанды интеллектті халықаралық деңгейде басқару жүйесін қалыптастыруға арналған маңызды алаңға айналды.
29 елдің өкілдері штаб-пәтері Шанхайда орналасатын Жасанды интеллект саласындағы дүниежүзілік ынтымақтастық ұйымын (WAICO) құру туралы келісімге қол қойды.
Сонымен қатар Қытай жасанды интеллект саласындағы халықаралық ынтымақтастық жөніндегі жаңа Іс-қимыл жоспарын және халықаралық өзара іс-қимылдың нақты мысалдарына арналған «Қытайдың жасанды интеллекті әлем игілігі үшін» жинағының үшінші басылымын таныстырды.
Форумға қатысушылардың пікірінше, WAIC 2026 жасанды интеллекттің дамуы жаңа кезеңге өткенін айқын көрсетті. Бұл кезеңде негізгі рөлді жекелеген технологиялар емес, ауқымды инфрақұрылымдық шешімдер, өнеркәсіптік енгізу, инновацияларды қолдау және халықаралық ынтымақтастық атқарады.
