Қытайдың Ханчжоу қаласында гуманоид роботтарды нақты өндірістік міндеттерді орындауға үйрететін Жасанды интеллектті қолдану жөніндегі ұлттық пилоттық база жұмысын бастады. Мұнда 140-тан астам робот «ақылды» асүйлер мен қоймаларға қызмет көрсетуден бастап ауыл шаруашылығы мен өнеркәсіпке дейінгі 40-тан астам жұмыс сценарийін меңгеруде.
Оқыту үдерісі нақты жағдайдағы жұмысты жоғары дәлдіктегі виртуалды модельдеумен ұштастырады. Мамандар роботтарды қашықтан басқарады, ал арнайы датчиктер олардың әрбір қозғалысын тіркеп, жасанды интеллект модельдерін оқытуға арналған деректер қорын қалыптастырады. Мұндай тәсіл әзірлеу шығындарын азайтып, жаңа технологияларды енгізу үдерісін жеделдетуге мүмкіндік береді.
Базада бүгінде ондаған компания мен ғылыми ұйым жұмыс істейді. Мұнда роботтандырылған асүйлер, қойма кешендері, дәл манипуляциялау жүйелері және ауыл шаруашылығына арналған автономды машиналар сынақтан өткізілуде. Әзірлеушілердің айтуынша, ортақ инфрақұрылым технологияларды жаппай енгізер алдында оларды тезірек жасап, тиімді сынақтан өткізуге мүмкіндік береді.
Жоба embodied intelligence бағытын дамытуға арналған ұлттық бағдарламаның бір бөлігі болып табылады. Қазірдің өзінде Ханчжоуда робот техникасы саласындағы 700-ден астам компания шоғырланған. Ал embodied AI кластерінің өнім көлемі 2025 жылы 106,8 млрд юаньнан асты. Әзірлеушілер сынақтар аяқталғаннан кейін роботтар өнеркәсіпте, логистикада, қызмет көрсету саласында және қалалық инфрақұрылымда кеңінен қолданылатын болады деп күтуде.
