Қытай мен Еуропа арасындағы арктикалық контейнерлік экспресс-бағыт жазғы навигация кезеңінде апта сайынғы тасымал режиміне көшті. Жаңа формат тасымалдардың тұрақтылығын арттырып, Азия мен Еуропа нарықтары арасындағы жүктерді жеткізу мерзімін қысқартуға мүмкіндік береді.
Бағыт жұмысының кезекті кезеңі Dubai Tower контейнер тасымалдаушы кемесінің Чжэцзян провинциясындағы Нинбо-Чжоушань портынан шығуымен басталды. Кеме Арктиканың Солтүстік-Шығыс өткелі арқылы өтіп, Филикстоу, Роттердам, Гамбург және Гданьск сияқты Еуропаның ірі порттарына аялдайды.
Бұл бағыт бойынша сынақ рейсі 2025 жылдың қыркүйегінде жүзеге асырылды. Сол кезде кеме Ұлыбританияның Филикстоу портына шамамен 20 күнде жетті. Салыстырмалы түрде алғанда, Қытай – Еуропа жүк пойызымен тасымалдау шамамен 25 күн, ал Суэц каналы арқылы теңізбен жеткізу 40 күнге жуық уақыт алады.
Жеткізу мерзімінің қысқаруы арктикалық бағытты, ең алдымен, қымбат әрі уақытылы жеткізуді қажет ететін өнімдерді тасымалдау үшін тартымды етеді. Dubai Tower Еуропаға энергия жинақтау жүйелерін, тартқыш аккумуляторларды, фотоэлектрлік модульдер мен электромобильдерге арналған компоненттерді тасымалдауда. Жүктің негізгі бөлігі Янцзы өзені атырауындағы өнеркәсібі дамыған қалалардан жеткізіледі.
Мұз жағдайына байланысты бұл бағыттағы навигация маусымдық сипатқа ие және негізінен шілдеден қазанға дейін жалғасады. 2026 жылы кемінде сегіз рейс орындау жоспарланған.
Тасымалдардың кеңеюі Қытай мен Еуропалық одақ арасындағы сауданың өсуімен қатар жүруде. ҚХР Сауда министрлігінің мәліметінше, 2026 жылдың бірінші жартыжылдығында Қытай мен ЕО арасындағы тауар айналымы 447,8 млрд АҚШ долларына жетіп, жылдық есеппен 14,2 пайызға өсті.
