Қытай қарқынды дамып келе жатқан жасанды интеллект саласының тұрақты әрі жүйелі дамуын қамтамасыз етуге бағытталған 200-ге жуық негізгі стандарт әзірледі.
Сонымен қатар елдің бірқатар қаласында жасанды интеллектіні қолдану тәжірибесі мен этикалық нормалардың сақталуына қатысты тексерулер жүргізілуде, деп хабарлайды «Синьхуа» агенттігі Қытай Халық Республикасының Өнеркәсіп және ақпараттық технологиялар министрлігіне сілтеме жасап.
Министрдің орынбасары Синь Гобиньнің айтуынша, жасанды интеллект зерттеу, әзірлеу және жобалаудан бастап өндіріске, сапаны бақылауға, пайдалану мен техникалық қызмет көрсетуге дейінгі бүкіл өндірістік тізбекке белсенді түрде енгізіліп жатыр. Осылайша жасанды интеллект дербес технологиялық сала ғана емес, Қытай өнеркәсібін жаңғыртудың маңызды құралдарының біріне айналуда.
Сонымен қатар Қытай телекоммуникациялық технологияларды дамытудың келесі кезеңіне дайындалып жатыр. 15-бесжылдық кезеңінде, яғни 2026-2030 жылдары ел алтыншы буын байланысының (6G) негізгі технологияларын әзірлеуді жеделдетуді жоспарлап отыр.
6G экожүйесін қалыптастыру үшін технологиялық сынақтарды жалғастыру және тиісті стандарттарды әзірлеу көзделген. Бұл жұмыс болашақта жаңа буын байланыс желілерін коммерциялық пайдалануға енгізу үшін негіз қалыптастыруға тиіс.
