Қытай жоғары оқу орындары Өзбекстан мен Әзербайжан университеттерімен жаңа бірлескен білім беру бағдарламалары туралы келісімге келді.
Келісімдер 9–13 қыркүйек аралығында Бейжіңде өткен 2026 жылғы Қытай халықаралық қызметтер саудасы жәрмеңкесі (CIFTIS) аясында жасалды.
Солтүстік Қытай технологиялық университеті (NCTU) мен Әндіжан мемлекеттік техникалық институты Заманауи инжиниринг мектебін бірлесіп құру туралы келісімге қол қойды.
Жаңа мектеп бакалавриаттың үш бағдарламасын — электрондық ақпараттық инженерия, мехатроника және электротехниканы ұсынады. Жыл сайын 75 студент қабылдау жоспарланған, 2026 жылғы күзгі семестрге студенттер қабылдау басталып кетті.
Оқу «2+2» моделі бойынша ұйымдастырылады: алғашқы екі жылда студенттер Әндіжан мемлекеттік техникалық институтында, келесі екі жылда Қытайдағы NCTU-да білім алады. Бағдарлама қос диплом алуды қарастырады.
Жоғары оқу орындары арасындағы ынтымақтастық оқыту мен ғылыми зерттеулерді де қамтиды. Басым бағыттардың қатарында жасанды интеллект, ақпараттық технологиялар, интеллектуалды өндіріс, жаңа материалдар, энергия жинақтау жүйелері және жаңа энергетика бар.
CIFTIS аясындағы тағы бір келісімге Бейжің ақпараттық ғылымдар және технологиялар университеті (BISTU) мен Әзербайжанның Нахчыван мемлекеттік университеті қол қойды. Жоғары оқу орындары ақпараттық қауіпсіздік саласындағы мамандарды бірлесіп даярлауды жоспарлап отыр.
