17 қыркүйекте Бейжіңде «ШЫҰ Хатшылығындағы Еуразиялық экономикалық одақ күндері» өтті. Іс-шараның негізгі қорытындыларының бірі 2027–2030 жылдарға арналған бірлескен іс-шаралар жоспарына қол қою болды.
Құжат 2021 жылғы 17 қыркүйекте Душанбеде қол қойылған Шанхай ынтымақтастық ұйымының Хатшылығы мен Еуразиялық экономикалық комиссия арасындағы өзара түсіністік туралы меморандумды іске асыруға бағытталған.
Биылғы іс-шара екі бірлестіктің өзара іс-қимылының құқықтық негізі қаланғанына бес жыл толуына орай және ШЫҰ-ның 25 жылдығы аясында өткізіліп отыр.
ШЫҰ Бас хатшысы Нұрлан Ермекбаев екі ұйымды географиялық жақындық, мүше мемлекеттер құрамының ішінара сәйкес келуі және экономикалық өзара іс-қимылды дамытуға деген ортақ мүдде байланыстыратынын атап өтті.
Еуразиялық экономикалық комиссия Алқасының төрағасы Бақытжан Сағынтаев ЕАЭО мен ШЫҰ арасындағы ынтымақтастықтың маңызын және практикалық байланыстарды одан әрі дамыту қажеттігін атап өтті.
Қол қойылған 2027–2030 жылдарға арналған жоспар агроөнеркәсіптік кешен, азық-түлік қауіпсіздігі және кедендік реттеу салаларында бірлескен іс-шаралар өткізуді көздейді. Тараптар сондай-ақ жасыл экономика, цифрландыру және ақпараттық-коммуникациялық технологиялар салаларында ақпарат және тәжірибе алмасуды жоспарлап отыр.
«ЕАЭО күндері» аясында «ЕАЭО — ШЫҰ: экономикалық ынтымақтастықты жандандыру» атты дөңгелек үстел өтіп, оның қатысушылары екі бірлестіктің өзара іс-қимылын кеңейту перспективаларын талқылады.
Сонымен қатар ШЫҰ Хатшылығында «ЕАЭО елдері: көрікті жерлер мен табиғи ландшафттар» фотокөрмесі таныстырылды.
