Қытайдың Нинся-Хуэй автономиялық ауданының әкімшілік орталығы Иньчуань қаласында 6-шы Қытай (Нинся) халықаралық шарап мәдениеті және туризм көрмесі өтіп жатыр. Іс-шара Қытай мен шетелдердің шарап өндірісі саласындағы өкілдерін біріктірді.
12–14 қазан аралығында өтіп жатқан көрмеге 16 елдің шарап өндіретін өңірлерінен 84 танымал шарап зауыты мен кәсіпорны қатысуда. Қытай атынан Нинся мен елдің басқа да ірі шарап өндіретін аймақтарындағы 146 жетекші шарап шаруашылығы ұсынылған.
Нинся үшін шарап өндірісі экономиканың маңызды саласына ғана емес, туристерді тартудың негізгі факторларының біріне де айналды. Жыл сайын жергілікті шарап зауыттарына шарап өндіру үдерісімен, өңірдің мәдениетімен және туристік бағыттарымен танысуға қызығушылық танытатын 3,7 миллионнан астам адам келеді.
Шарап өндірісі мен оған байланысты туристік қызметтің жиынтық экономикалық тиімділігі 50 миллиард юаньнан немесе шамамен 7,4 миллиард АҚШ долларынан асады.
Иньчуаньдағы халықаралық көрме шарап өндірушілер арасындағы іскерлік байланыстарды дамытуға, салалық тәжірибе алмасуға және шарап өндіретін өңірлерді туристік нарықта ілгерілетуге арналған алаң қызметін атқарады.
