Будапешт қаласында Мажарстанның Ұлттық Банкі (Magyar Nemzeti Bank) ұйымдастырған «Тұрақты даму үшін өтпелер» тақырыбында «Budapest Eurasia Forum» өтті, деп хабарлайды DKNews.kz.
Іс-шара бағдарламасы алты тақырыптық панельдік сессиядан тұрды, олардың әрқайсысында геосаясаттың, тұрақты даму мен цифрландырудың жаңа түсіндірмелері мен қырлары талқыланды.
Іс-шараның негізгі мақсаты көптеген экономикалық және әлеуметтік секторлардың өкілдері қаржы, экономика, геосаясат, көпжақты ынтымақтастық, технологиялар, білім беру және мәдениет салаларында өзара іс-қимыл жасап, идеялармен алмасатын халықаралық платформа құру болды.
Іс-шараның екінші күні Еуразиялық форум алаңында АХҚО қаржы қызметтерін реттеу комитетінің (AFSA) Бас директоры Нұрхат Кушимовтың Мажарстанның Ұлттық Банкі Басқарушысының орынбасары Чаба Кандрачпен кездесуі өтті, оның барысында AFSA мен Magyar Nemzeti Bank арасында өзара түсіністік туралы Меморандумға қол қойылды.
Бұл маңызды келісім екі реттеушінің де қаржы секторындағы трансшекаралық ынтымақтастықты дамытуға, жоғары деңгейдегі тұрақты байланыстарға және қаржы нарықтары туралы ақпарат алмасуға бағытталған серіктестікті нығайту ниетін көрсетеді. Екі тарап реттеушілік қадағалаудың жоғары стандарттарын қолдауға және тұрақты және серпінді қаржылық экожүйені құруға жәрдемдесуге ниетті.
Өзара түсіністік туралы Меморандумға қол қою алдында форумда AFSA және Мажар қорлар мен активтерді басқару компаниялары қауымдастығының (BAMOSZ) бірлескен ақпараттық сессиясы өтті.
