Брюссельде Транскаспий халықаралық көлік бағытының перспективалары талқыланды, деп хабарлайды DKnews.kz.
Қазақстанның Бельгиядағы Елшісі Марғұлан Баймұхан Брюссельдегі Түркия Сауда палаталары және тауар биржалары одағының өкілдігі, Еуропалық сараптамалық орталық және Түркия мен Еуропалық Одақ арасындағы қатынастарды зерттеуге маманданған экономикалық даму қоры ұйымдастырған «Жеткізу тізбектері, көлік дәліздері және ЕО-Түркия қатынастары: үлкен өзара байланысқа ұмтылыс» атты конференцияға қатысты.
Шараға ЕО, Орталық Азия және Түркия елдерінің дипломатиялық миссияларының басшылары, Еуропалық комиссия өкілдері мен көлік байланысы мәселелері бойынша жетекші сарапшылар қатысты.
Өз сөзінде М. Баймұхан ғаламдық сын-тегеуріндер мен жеткізу тізбектеріндегі өзгерістер жағдайында тұрақты әрі тиімді көлік дәліздерін құрудың маңыздылығын атап өтті. Ол Қазақстанның көлік инфрақұрылымын, оның ішінде Ақтау және Құрық теңіз порттарын жаңғырту, Қытай мен Орталық Азия елдерімен теміржол байланыстарын кеңейту бойынша белсенді жұмыс жүргізіп жатқанын айтты. Бұл шаралар қысқа мерзімде Қытай бағытындағы өткізу қабілетін 37 млн тоннаға, ал Орталық Азия бағытында 20 млн тоннаға дейін ұлғайтуға мүмкіндік береді.
Елші сондай-ақ осы жылы іске қосылған Транскаспий халықаралық көлік бағытын заманауи мультимодальды дәліз ретінде дамытуға бағытталған үйлестіру платформасы туралы баяндады. Дипломат Орта дәліздің табысы маршрут бойындағы барлық елдердің үйлестірілген іс-әрекеттеріне байланысты екенін ерекше атап өтті.
«Қазақстан тек транзиттік мемлекет қана емес, сондай-ақ әлемдік нарықтардың тұрақтылығы мен өзара байланысын арттыруға бағытталған жаһандық процестердің белсенді қатысушысы болуға ұмтылады. Біз Еуропалық Одақпен сындарлы диалог пен ынтымақтастықты тереңдетуге дайынбыз» қазақ дипломаты
Конференция неғұрлым тұрақты көлік тізбектерін құру және Еуропалық Одақ, Орталық Азия және Түркия арасындағы экономикалық ынтымақтастықты нығайту бойынша бірлескен күш-жігерді талқылауға арналған маңызды алаңға айналды. Қазақстан ЕО-ның өңірлік және жаһандық байланыстарды дамытудағы стратегиялық серіктесі ретіндегі рөлін тағы бір мәрте растады.
