Франциядағы танымал баспалардың бірі «Petit Futé» шығарған «Қазақстан» атты жаңа туристік гидтің тұсаукесер рәсімі Париждегі ҚР Елшілігінде өтті, деп хабарлайды DKnews.kz.
Іс-шара қазақ киіз үйінде ұйымдастырылып, ұлттық дәстүр мен мәдениетке толы әсерлі кешке айналды.
Таныстырылымға Қазақстанның Франциядағы Елшісі Гүлсара Арыстанқұлова, гид авторы Эрве Керрос, Овернь-Рона-Альпі аймағындағы ҚР Құрметті консулы Софи Сидос, сондай-ақ француз туристік индустриясының өкілдері мен қоғам қайраткерлері қатысты.
Г. Арыстанқұлова өз сөзінде ҚР Үкіметі соңғы жылдары туризм саласын дамытуға, шетелдік туристерге қолайлы жағдай жасауға, сондай-ақ елдің халықаралық туристік аренадағы имиджін арттыруға бағытталған маңызды бастамаларды жүзеге асырып жатқанын атап өтті.
«Қазақстан – қауіпсіз, заманауи әрі саяси тұрақты мемлекет. Біз кең байтақ жеріміздің табиғи байлығы мен мәдени мұрасын барынша ашып көрсетуге мүдделіміз. Экотуризмнен бастап этнографиялық және тарихи бағыттарға дейін елімізде әртүрлі туристік өнімдерді дамытуға мол мүмкіндік бар» Гүлсара Арыстанқұлова
Эрве Керрос өз кезегінде Қазақстанды француз оқырмандарына жақынырақ таныстырудың маңыздылығын атап өтті:
«Бұл басылым Қазақстанның бай табиғаты мен мәдениетін, қонақжай халқын, өзіндік ерекшелігі бар тұрмысын көрсетуге арналған. Француз саяхатшылары үшін Қазақстан әлі де ашылмаған інжу-маржан. Бұл гид – сол әлемге алғашқы қадам»
Тұсаукесер аясында жас қазақстандық композитор Ғаламат Бейсеқожа «Ұлы дала толғауы» мен «Көшпенділер» атты авторлық шығармаларын орындап, іс-шара қонақтарына қазақтың дәстүрлі музыкасын таныстырды. Қонақтар ұлттық тағамдардан дәм татып, қазақ мәдениетінің байлығына тағы бір мәрте көз жеткізді.
«Қазақстан» туристік гиді (2025-2026 жж.) қазіргі таңда «Amazon» және «Fnac» платформаларында сатылымда. Басылымда саяхатшыларға арналған пайдалы кеңестер, елдің өңірлері мен көрікті жерлері туралы кең ақпарат, мәдениет пен салт-дәстүрге қатысты танымдық мәліметтер берілген.
