ММЛУ студенттері ҚР РФ Елшілігінде қонақ болып қайтты, деп хабарлайды DKnews.kz.
Қазақстанның Ресейдегі Елшілігіне Мәскеу мемлекеттік лингвистикалық университетінің (ММЛУ) студенттері қонақ болды.
Олардың арасында Қазақ тілі мен мәдениеті орталығында қазақ тілін үйренушілер де бар. Орталық ҚР-дың РФ-тағы Елшілігінің және Әл-Фараби атындағы ҚазҰУ қолдауымен 2003 жылы ашылған. Осы уақыт ішінде мұнда бірнеше ондаған ресейлік студенттер қазақ тілін үйренді.
Қонақтармен әңгімелесу барысында Қазақстанның Ресейдегі Елшісі Дәурен Абаев елдің негізгі жетістіктері, ағымдағы әлеуметтік-экономикалық және саяси дамуы туралы хабардар етті. Ол мамандық ретінде қазақ тілін таңдағаны үшін жастарға ризашылығын білдіріп, оқуда табыс тіледі және олардың көптеген сұрақтарына жауап берді.
Кездесу соңында студенттер Қазақстан-Ресей қарым-қатынастары тарихы мұражайының экспозициясымен танысты.
