Астанада алғашқы рет «EXPOGOODS CENTRAL ASIA» Халықаралық форум-көрмесі өтеді, деп хабарлайды DKnews.kz.
2025 жылдың 11–13 маусымы аралығында Астанадағы Халықаралық көрме орталығында «EXPOGOODS CENTRAL ASIA» атты алғашқы Халықаралық форум-көрме өтеді. Бұл ауқымды іс-шара Орталық Азия, ТМД, Таяу Шығыс, Азия және Еуропа елдері арасындағы сауда-экономикалық байланысты дамытуға арналған маңызды салалық алаң болмақ.
Форумға Әзербайжан, Беларусь, Иран, Қытай, Қырғызстан, Біріккен Араб Әмірліктері, Пәкістан, Ресей, Түркия, Түрікменстан, Өзбекстан және Еуропалық одақ елдері сияқты 10-нан астам елден қатысушылар келеді. Іс-шараның басты мақсаты — ынтымақтастықты нығайту, экспорт-импорт белсенділігін арттыру және өңірдегі іскерлік әріптестікті кеңейту.
Форум аясында мемлекеттік органдардың, бизнес пен халықаралық сарапшылардың қатысуымен пленарлық отырыстар, панельдік пікірталастар мен дөңгелек үстелдер қамтылған мазмұнды іскерлік бағдарлама ұсынылады. Қатысушылар халықаралық сауда, логистика, бөлшек сауданың цифрлануы және FMCG секторындағы тұрақты даму мәселелерін талқылайды.
EXPOGOODS CENTRAL ASIA форумының алғашқы күні «Astana International Trade Forum» аясында өтеді. Бұл күні әртүрлі елдердің жеткізушілері мен сатып алушылары арасындағы нақты сауда ынтымақтастығы мүмкіндіктері қарастырылады. Әсіресе, қазақстандық өндірушілердің экспорттық әлеуетін дамытуға ерекше көңіл бөлінеді.
«International Retailers’ Days» бөлімінде тауар өндірушілер жетекші халықаралық бөлшек сауда желілерінің өкілдеріне өз өнімдері мен ұсыныстарын таныстыратын сессиялар өтеді. Бұл — жаңа нарықтарға шығуға және тікелей іскерлік байланыстар орнатуға бірегей мүмкіндік.
Сондай-ақ, жеткізушілер мен сатып алушылар арасында жеке B2B келіссөздер өткізіліп, ұзақ мерзімді келісімшарттар жасауға және жеткізу тізбектерін кеңейтуге жол ашылады.
Форумның екінші күнінде «HoReCa Congress» өтеді — бұл қонақ үй және мейрамхана бизнесіндегі 150-ден астам компанияны біріктіретін халықаралық алаң. Айтулы шараға қатысушылар қонақжайлылық индустриясындағы трендтерді, жабдықтар мен қызмет көрсету саласындағы инновацияларды, сондай-ақ басқару мен маркетингтің үздік тәжірибелерін талқылайды.
Көрме экспозициясында әртүрлі бағыттар бойынша өнімдер мен шешімдер кеңінен ұсынылады.
FOOD GOODS & HORECA бөлімінде азық-түлік, сусындар, тағамдық қоспалар мен биологиялық белсенді қоспалар қойылады.
OUTDOOR HORECA — мейрамхана террассаларына, верандаларға және көшпелі іс-шараларға арналған көше жабдықтарына арналған.
NON-FOOD GOODS бөлімінде тұрмыстық тауарлар, ыдыс-аяқ, тұрмыстық химия, косметика, гигиеналық құралдар, балалар мен үй жануарларына арналған өнімдер, сондай-ақ кеңсе тауарлары ұсынылады.
PRODUCTION & SERVICE бөлімінде шикізат, орау шешімдері, жабдықтар, логистика және бизнеске арналған сервистермен танысуға болады.
EXPOGOODS CENTRAL ASIA — өндірушілер, бөлшек саудагерлер, дистрибьюторлар, инвесторлар мен мемлекеттік құрылымдар арасында жаңа диалог алаңын ұсынатын бірегей іскерлік платформа болмақ. Бұл іс-шара Орталық Азия аймағының экспорттық әлеуетін арттырып, ұзақ мерзімді серіктестіктер орнатуға және тиімді келісімшарттар жасасуға бағытталған.
Форумға қатысуға мемлекеттік органдар мен салалық қауымдастықтардың өкілдері, азық-түлік және тұтыну тауарларын өндірушілер мен жеткізушілер, дистрибьюторлар, сауда желілері, импорттаушылар мен экспорттаушылар, сондай-ақ HoReCa секторының компаниялары шақырылады.
Форум ұйымдастырушысы — ҚР Сауда және интеграция министрлігінің қолдауымен «Mayer Expo Asia» ЖШС.
