Қазақстанда 15-23 мамыр аралығында жұмыс жасаған Халықаралық валюта қоры (ХВҚ) миссиясының сапары аяқталып, оның қорытындысы бойынша ресми мәлімдеме жарияланды. Құжатта елдің экономикалық жағдайына шолу, болашақ даму перспективалары мен саясатқа қатысты ұсыныстар қамтылған, деп хабарлайды DKnews.kz.
Қазақстан экономикасының өсу қарқыны жоғары
ХВҚ сарапшыларының пікірінше, Қазақстан экономикасы қызмет көрсету, көлік, құрылыс, өңдеу және өндіру өнеркәсібіндегі белсенділік нәтижесінде жоғары өсім көрсетіп отыр. Сонымен қатар, мемлекеттік инфрақұрылымдық инвестициялар ұлғайып, цифрлық технологиялар, жасанды интеллект (ЖИ), агроөнеркәсіп және логистика салаларында ірі жобалар жүзеге асырылуда.
Бұл трендтер Қазақстанның инновация мен әртараптандыруға бағытталған саясатының нәтижесін көрсетеді.
Негізгі қауіптер мен инфляциялық қысым
Мәлімдемеде Қазақстан экономикасы үшін бірқатар тәуекелдер де атап өтілген:
- Ірі инфрақұрылымдық жобаларды іске асырудағы кідірістердің ықтимал салдары – экономикалық өсудің баяулауы;
- Инфляциялық қысымның артуы, әсіресе тұтынушылық сұраныстың өсуі аясында;
- Сауда протекционизмінің күшеюіне байланысты сыртқы белгісіздік;
- Мұнай бағасының төмендеуі және Қазақстанның негізгі сауда әріптес елдеріндегі өсімнің баяулауы.
ХВҚ сәуір айында инфляция деңгейінің жеделдегенін атап өтті және 2025 жылы инфляция 10,5% деңгейінде сақталады деп болжайды. Бұл Ұлттық Банктің мақсатты дәлізінен жоғары көрсеткіш болып отыр.
Ұсыныстар: ақша-кредит саясаты мен қаржылық тұрақтылық
ХВҚ инфляцияны бақылау үшін тежеуші ақша-кредит саясатын сақтауды ұсынады. Сонымен қатар, макропруденциалдық саясатты қатаңдату жоспарлары оң бағаланып, бұл тұтынушылық несиелеудің өсуі аясында қаржылық тұрақтылыққа төнетін қауіптерді азайтуға мүмкіндік береді.
ХВҚ миссиясы қыркүйекте қайта оралады
Келесі сапар IV бапқа сәйкес жоспарланған және 2025 жылдың қыркүйегінде өтеді. Бұл кезеңде ХВҚ Қазақстанның макроэкономикалық саясатын тереңірек талдап, кеңестерін жалғастыруды жоспарлап отыр.
