Қазақстанның халық әртісі Димаш Құдайберген жақын арада әлемнің ең танымал алаңдарының бірінде – 150 жылдан астам тарихы бар Madison Square Garden сахнасында жеке концерт беретін ТМД елдерінен шыққан алғашқы әнші атанбақ. Нью-Йорктегі осы әйгілі сахнада өтетін концерт туралы жаңалық аспаннан түскендей әсер қалдырды. DK Media Europe арнайы тілшілері Еуропада өткен жанкүйерлермен кездесу шараларына қатысып, осы маңызды оқиғаны жіті бақылап қайтты.
Посмотреть эту публикацию в Instagram
Билеттер сатыла бастаған сәттен-ақ билет сатушының серверлері нағыз көрермендер ажиотажының куәсі болды. Бұл туралы Алматыда өткен фан-кездесу кезінде қарапайым ғана үнмен айтқан Қазақстанның халық әртісі Димаш Құдайберген сол сәтте бұл жаңалықтың тыңдармандарын қаншалықты қуантатынын өзі де болжай алмаған шығар. Бұл таңғаларлық емес, өйткені әлемдегі әрбір спорт немесе музыка жанкүйерінің арманы – өмірінде бір рет болса да Нью-Йорктегі Madison Square Garden аренасында көрермен болу. Әсіресе, ол сахнада миллиондаған адамның жүрегін жаулаған, планетаның ең үздік дауысы – қазақстандық әнші жеке концерт бермек болса.
Билетті әрең алып, әлі есін жия алмай жатқан бақытты жанкүйерлер Димашпен кездесуге Барселонаға жол тартты.
2025 жылдың маусымы Димаш Құдайберген үшін шығармашылық тұрғыдан ерекше жемісті болды. Ай Испанияның ыстық күндерімен басталып, әншінің Батыс Еуропадағы алғашқы фан-кездесуі мен баспасөз конференциясымен ерекшеленді. Одан соң әлемге әйгілі канадалық-бельгиялық әнші Лара Фабианның жеке концертіне арнайы қонақ ретінде Лондонға ұшып барды. Бір күннен кейін британ астанасында тағы бір фан-кездесу өтті. Аңызға айналған опера майталмандары Пласидо Доминго және Хосе Каррераспен бірге «My Way» әнінің премьерасынан кейін Димаш Астанада өткен «Орталық Азия – Қытай» саммитінің аясындағы іс-шараларға қатысып, Шанхай халықаралық кинофестивалінің жабылу салтанатында жарқын өнер көрсетті.
Барселона әуежайында сүйікті әншісін қарсы алуға жиналған жанкүйерлер халықаралық хор ұйымдастырып, кездейсоқ жолаушылардың да назарын аударды. Әнші өзі жайлы әнге құмар жанкүйерлері туралы әдеттегі әзіл-шыны аралас мәнерде:
«Кейбіреуі менен де дарынды», – деп айтады кейінірек фан-кездесу барысында.
Сол кеште Испанияның алыстағы әуежайының күту залында Диарс әншінің жаңа «Тау ішінде» атты қазақ тіліндегі әнін шырқады.
Келесі күні Hyatt Regency Barcelona Tower қонақүйінің жайлы залында өткен фан-кездесу әншінің Батыс елдеріндегі «Stranger» гастрольдік турының басталғанын білдірді. Әлемге әйгілі әншіні Жер шарының түкпір-түкпірінде тағатсыздана күтуде, ал биылғы жылы ол Лондон, Берлин, Рига, Барселона және Нью-Йорк қалаларында жеке концерт береді деп жоспарланған. Жоспарлары жайлы айта отырып, Димаш көрермендеріне бұрыннан таныс ұстанымын тағы да атап өтті:
«Мен сахнаға шығарда қай ел, қай қала екені маңызды емес, әрқашан ең үздік өнер көрсетуге тырысамын. Өйткені жанкүйерлерім жақсы шоуға, жақсы әндерге лайық. Сол үшін барымды салуға тырысамын», – деді ол.
Көп тілде ән салатын Димаш өзіне қонақжайлық танытқан елдің халқына әрдайым құрмет білдіруге тырысады. Бұл жолы да ол испан аудиториясы үшін бірнеше сәлемдесу сөздерін испан тілінде арнайы жаттап келіп, тыңдармандарын тәнті етті:
«Мен мұнда болғаныма өте қуаныштымын. Қолдауларыңыз үшін үлкен рақмет. Әрине, Испаниядағы концертте испан тілінде ән айтуға барынша тырысамын», – деді әнші.
@DimashNews
Фан-кездесуге қатысушыларды осы сұрақ ерекше қызықтырды, өйткені Димаш әрдайым жеке концерттеріне тосынсый дайындайды. Сірә, Барселона да бұл дәстүрден тыс қалмайтын сияқты.
Осы жолы фан-кездесуге келгендерге концертке дейін-ақ Димаштың испан тілінде ән шырқағанын көру бақыты бұйырды. Жанкүйерлердің сүйікті әні – аңызға айналған «Bésame mucho» кеш бойы қайта-қайта шырқалды.
«Міне, болашақ концертке арналған ән табылды», – деп әзілдеді фан-кездесуге қатысқан Димаштың әкесі әрі DimashAli шығармашылық орталығының продюсері Қанат Айтбаев.
Бұл жолы тек көрермендердің арманы орындалмайды. Димаштың да бала кезден аңсаған арманы – әлемдегі ең атақты концерт алаңдарының бірі – Madison Square Garden-де жеке концерт беру – жақында орындалмақ. Осыған орай қойылған сұраққа: «Мұндай қарқынмен армандар таусылып қалмай ма?» – деп әнші:
«Қорықпаймын. Қатты толқудамын. Армандарым Алланың және сіздердің – менің көрермендерімнің қолдауының арқасында орындалып жатыр. Егер көрермендерім мен жанкүйерлерім болмаса, менде ештеңе болмас еді. Көп рақмет сіздерге!» – деп жауап берді.
Нью-Йорктегі жоспарланған концерт жайлы айта отырып, Димаш арнайы бағдарлама дайындап жатқанын мәлімдеді:
«Мен бүкіл әлемге танымал қонақтарды шақырғым келеді. Madison Square Garden – әлемдегі ең әйгілі концерт алаңдарының бірі болғанымен, мен үшін бастысы – өз жұмысымды 100 пайыз атқару, сіздердің қошеметтеріңізге лайық болу. Бұл концерт – менің елім, Қазақстан үшін тарихи сәт болмақ. Мен – бұрынғы ТМД елдерінің ішінде алғаш болып онда жеке концерт өткізетін боламын. Сол себепті мен өз командамның барлық мүшелеріне, ата-анама, музыканттарыма, достарыма үлкен алғыс айтқым келеді. Мен қатты толқып жүрмін», – деді ол.
Әншінің толқуы мен ата-анасы мен достарына деген шынайы алғысы өте орынды. Димаштың әкесі Қанат Айтбаев:
«Димаш кішкентайынан музыкалық отбасында өсті. Менің барлық достарым – музыканттар. Анамыздың барлық құрбылары да – музыканттар. Үйге жиналғандардың бәрі ән айтады. Ата-анам басқа салада жұмыс істесе де, ән айтады. Анам жағынан да бәрі ән салады. Сондықтан оның музыкант болмауына мүмкіндік болған жоқ», – деп ағынан жарылды.
Бұл – оның кіші інісі – Әбілмансұрға да қатысты. Ол да Барселонадағы кездесуге жаңа қызметі – мобилограф ретінде қатысты. Ағасының өтінішімен кештің бір сәтінде Мансұр фортепианоға отырып, фан-клубтың бейресми әнұранына айналған «Махаббат бер маған» әнін ағасымен бірге орындады. Залда отырған халықаралық аудитория лирикалық дуэтті қосыла шырқады, ал Димаш бұл әсерлі сәтті камераға түсіріп алды.
Атап өтер жайт, Димаштың өнеріне шын берілген көптеген шетелдік жанкүйерлер оның қазақша әндерін үйреніп қана қоймай, қазақ мәдениеті мен Қазақстанға да терең қызығушылық танытып жүр. Бұл – Димаштың өз халқына адалдығы мен еңбегінің айқын нәтижесі.
«Біз Сізді тек музыкаңыз үшін емес, сондай-ақ дарыныңыз үшін жақсы көреміз. Сіз арқылы біз өмірімізге, жүрегімізге жаңа елді аштық», – деп бөлісті фан-кездесуге келген қонақтардың бірі. Оның өнердегі мақсаты туралы қойған сұрағына әнші былай деп жауап берді:
«Мен бала кезімнен осы сәтті армандадым. Қазір мен бүкіл әлемге халқымыздың бай мәдениеті мен оның философиялық мәнін таныстыра аламын. Мен әлемге өзіміздің мәдени мұрамызды, елімізді, тамаша әндерімізді көрсеткім келеді. Қазір осы миссияны орындауға мүмкіндігім бар. Сондықтан осы бағытта жұмыс істей бергім келеді. Өте маңызды себебім бар», – деді Димаш.
Бұл миссияны талантты әнші сәтті атқаратынына ешкімнің күмәні жоқ. Мұны фан-кездесуде болған бір жанкүйердің сөзі дәлелдейді: ол Димаш арқылы қазақ фольклорын ғана емес, халық әндерінің тарихын да зерттей бастаған. Әңгіме жүз жылдық тарихы бар «Балқадиша» әні туралы өрбіді:
«Бұл – өте ескі ән. Сіз арқылы мен оның тарихын білдім. Біз ағылшынша, орысша әндер тыңдаймыз, бірақ көбіне қазақша тыңдаймыз. Бұл ән мені жылатты», – деді ол.
Филиппиннен келген көрерменнің сөздері де сондай әсерлі болды:
«Сіз бізге қазақ мәдениетін танытқаныңыз үшін рахмет. Қазақ музыкасы өте әдемі. Менің сүйікті әндерімнің бірі – «Дударай», – деп ол сахнада акапелла айтып берді. Димаш пен әкесі бұл әсерлі сәтке қосылып, бірге ән шырқады.
Тағы бір жанкүйердің басынан өткен оқиға да жан тебірентерлік болды. Испаниядан келген жас қыз өзінің деменциямен ауыратын анасымен байланыс орнатуға Димаштың музыкасы көмектесетінін айтты. Әнші көз жасын тыя алмаған қарияның қолынан ұстап, жылы сөздермен жұбатты. Бұл сәт залда отырғандардың барлығын тебірентті.
Кездесуге келген 400-ге жуық жанкүйер арасында Испания, Италия, Мексика, Германия, Австрия, Англия, Швейцария, АҚШ, Чехия, Украина, Өзбекстан, Латын Америкасы, Израиль, Вьетнам, Ресей, Қазақстан және басқа да елдердің өкілдері болды. Ерлер мен әйелдер, қариялар мен жастар, тіпті балалар да бар.
Ең кішкентай жанкүйерді Димаш көтеріп алып, микрофонды ұстап тұрып, бірдеңе айтуын сұрады. Қыз бала одан сүйікті әнін сұрады. Ол ән – Қазақстанның мемлекеттік әнұранынан кейін француз рок-операсынан алынған ария – «S.O.S. d’un terrien en détresse» болды.
Бұл ән 2017 жылы Қытайдағы «I’m Singer» байқауында Димашты әлемге танытқан туынды болатын. Франция президенті Эммануэль Макронмен кездесуде де Димаш бұл ән туралы айтқан.
«Бұл – жай ән емес. Бұл терең мағынасы бар, философиялық ойлармен байланысты ән. Көпшілік мен бұл әнмен тек дауыс диапазонымды көрсеткім келді деп ойлайды. Бірақ мен бұл әнді жаныммен айттым. Мен бұл әнді қатты жақсы көремін. Бұл менің жүрегімде мәңгі қалады», – деді ол.
Фан-кездесу қатысушылары әншіден «егер әнші болмасаңыз, кім болар едіңіз?» деген сұрақ қойды. Димаш:
«Мен әрдайым әнші болғым келді. Бір сәтке де күмән болған жоқ. Құдайдың басқа жоспары болған шығар, бірақ мен ешқашан күмәнданған емеспін. Неге екенін білмеймін, бәрі бала күнімде ойлағандай жүзеге асты», – деп жауап берді.
Қасындағы әкесі баласының балалық шағынан естелік айтып берді:
«Бес жасында сахнаны, аппараттарды, барабандарды, гитараларды, аспаптарды сала бастады. Сұрасам, «Бұл менің сахнам. Мен осында ән айтамын. Әлемге әнімді жеткіземін», – дейді. Қазір бәрі сол балалық арманы сияқты орындалып жатыр», – деді ол.
Жанкүйерлер Димаштың бірегей дауыс мүмкіндіктеріне сенеді және оның дауысы алдағы уақытта да сақталса екен деп тілейді. Әнші бұл жайында:
«Мен барлық дыбыстарды мықты тірекпен орындаймын. Сондықтан дауыс сымдарыма көп салмақ түспейді. Төрт сағаттық концерттерде әртүрлі жанрда, тілде, диапазонда ән орындасам да, өзімді жайлы сезінемін. Кейде концерттен кейін тағы бір концерт бергім келеді. Мен тыңдармандардан энергия аламын. Болашақта да дауысым өзгереді, бірақ дұрыс техникамен ол әлі ұзақ жылдар бойы шығады», – деді.
Осы энергияны фан-кездесуге қатысушылар 2024 жылы Астанада өткен екі жеке концерт негізінде түсірілген фильмнің үзіндісін көрген кезде сезінді. 40 мың адамдық залда ән салған кездегі сезімі туралы сұраққа Димаш:
«Қорқынышты», – деп шынайы жауап берді.
Әкесі әрі продюсері бұл сәтті пайдаланып, былай деді:
«Осы концерттерге билет операторының мәліметі бойынша әлемнің 82 елінен 13 мың адам келді. Бұл – ауқымды оқиға. Келіп, концертке уақыт бөліп, ұзақ жолды еңсеріп, бізге қолдау көрсеткендеріңіз үшін үлкен алғысымызды білдіреміз. Қазақстанға жиі келіңіздер. Біз сіздерді әрдайым құшақ жая қарсы аламыз!»
Қанат Айтбаевтың бұл сөздерінің шынайылығына ешкім күмән келтірмеді. Көптеген шетелдік жанкүйерлер Қазақстанға келіп, қазақ мәдениетін насихаттап, тілді үйреніп, ұлттық аспаптарда ойнауды меңгеріп жүр. Олар мектептер мен балалар үйлерінде қайырымдылық шараларын ұйымдастырып, былтырғы су тасқыны кезінде Қазақстан халқына көмек ретінде қаражат жинап, көмек көрсетті. Қанат Айтбаев:
«Былтыр Қазақстанда табиғи апат болды. Көп аймақтарды су басты. Бірақ ешкім бей-жай қалмады. Диарстар қайырымдылық шотына көп қаражат аударды. Сол қаражат үйлерді қалпына келтіруге жұмсалды. Сіздерге үлкен алғыс айтамын!» – деді.
Кездесу махаббат пен түсіністік атмосферасында өтті. Фанаттар сүйікті әншілеріне өз қолдарымен салған суреттерін, испан ұлттық аспабын, дискілер мен пластинкаларды, Барселона футбол клубының формасын және сансыз гүл шоқтарын сыйға тартты. Шынайы махаббат деген – осы. Микрофонға шыққан әр жанкүйер алдымен алғыс айтып, содан кейін ғана сұрақтарын қойды. Димаш та өз кезегінде тыңдармандарына алғыс білдірді:
«Мен үшін осында болу – үлкен бақыт. Шығармашылық адамы ретінде мені әрдайым қолдайтын фан-базаның бары – үлкен бақыт. Сіздерге рақмет. Сіздердің арқаларыңызда мен сахнада өнер көрсете аламын!»
Шын мәнінде, мұндай жанкүйерлер әрбір әртістің арманы. Олар сүйікті әншілерін қолдау үшін кез келген қашықтықты бағындырып, кез келген шекарадан өтеді.
