DKNews.kz басылымына арналған эксклюзивті мақаласында ҚХР-дың Қазақстан Республикасындағы Төтенше және Өкілетті Елшісі Хань Чуньлинь Қытайдың жаңғырудың жаңа кезеңі, халық бірлігі және Қазақстанмен стратегиялық серіктестігі туралы ой бөліседі.
20-23 қазан аралығында Бейжіңде Қытай Коммунистік партиясы Орталық Комитетінің 20-шақырылымдағы 4-пленумы өтті. Бұл жиын 15-бесжылдықтың мақсаттарына қол жеткізу жолындағы маңызды кезең болды. Пленумда елдің алдағы жылдарға арналған экономикалық және әлеуметтік даму стратегиясын айқындайтын ұсыныстар қабылданып, 2035 жылға қарай социалистік жаңғыруды жүзеге асырудың берік іргетасы қаланды.
Елші атап өткендей, қытайлық даму жолының күші - халықтың бірлігінде, тұрақтылық пен жүйелі дамуында. 15-бесжылдық кезеңі елдің ғылыми-техникалық дербестігін нығайтуға, инновацияларды дамытуға және халық тұрмысының сапасын арттыруға бағытталады. Хань Чуньлиннің айтуынша, Қытай Қазақстанмен стратегиялық байланыстарды тереңдетуге, өзара сенімді нығайтуға және ортақ өркендеудің жаңа көкжиектерін ашуға дайын. Бұл екі ел арасындағы мәңгі достыққа, ынтымақ пен өзара қолдауға негізделген ортақ тағдыр қауымдастығын құру жолындағы маңызды қадам болмақ.
Бірлік күші - қытайлық жаңғырудың жаңа кезеңі
2025 жылғы 20-23 қазан аралығында Бейжіңде ҚКП Орталық Комитетінің 20-шақырылымдағы 4-пленумы сәтті өтті. Негізгі нәтиже ретінде ҚКП ОК-нің «Халық шаруашылығы мен әлеуметтік дамудың 15-бесжылдық бағдарламасын әзірлеу туралы ұсыныстары» қаралып, қабылданды. Бұл құжат Қытайдың алдағы бес жылдағы экономикалық және әлеуметтік дамуының жүйелі жоспары мен стратегиялық бағыттарын айқындады.
Бесжылдық жоспарларды ғылыми тұрғыдан әзірлеу мен дәйекті түрде жүзеге асыру - ҚКП-ның мемлекет басқарудағы маңызды тәжірибесі және қытайлық ерекшелігі бар социализмнің саяси артықшылығы. Бірінші бесжылдықтан бастап он төртінші бесжылдыққа дейін Қытайды заманауи социалистік держава ретінде қалыптастыру негізгі мақсат болып қала берді. ХХ съезде ұсынылған «екі кезеңді» стратегиялық жоспардың ішінде 15-бесжылдық ерекше орын алады. 2035 жылға қарай социалистік жаңғырудың негізгі кезеңі жүзеге асырылады деп жоспарланған. Ал 14-бесжылдық осы бағыттағы берік негізді қалап, сәтті бастама болды. Қытайдың экономикалық қуаты, ғылыми-техникалық әлеуеті және жалпы ұлттық күш-қуаты жаңа деңгейге көтерілді.
2025 жылы Қытайдың ЖІӨ шамамен 140 трлн юаньға жетеді деп күтілуде. 15-бесжылдық кезеңі - іргетасты бекітіп, кешенді дамуға бағытталған шешуші уақыт. Дегенмен, қазіргі даму жағдайында Қытай күрделі әрі терең өзгерістермен бетпе-бет келіп отыр: стратегиялық мүмкіндіктер мен тәуекелдер қатар жүруде, болжауға қиын және белгісіз факторлар көбейді. Соған қарамастан, Қытай экономикасының берік негізі, көптеген артықшылықтары мен әлеуеті сақталып отыр. Ұзақ мерзімді оң даму үрдісі мен экономикалық тұрақтылық жалғасуда.
Даму - Қытайдың барлық мәселелерін шешудің басты кілті
15-бесжылдық кезеңінде Қытай жоғары сапалы дамуды негізгі бағыт ретінде ұстануы тиіс. Жаңа даму тұжырымдамасын кешенді жүзеге асырып, өндірістік күштердің жаңа архитектурасын қалыптастыру жеделдетіледі. Бұл процесте аймақтық ерекшеліктер ескеріледі. Ғылыми-техникалық инновацияларға сүйене отырып және нақты экономикаға арқа сүйеп, заманауи өнеркәсіп жүйесін қалыптастыру қажет. Бұл тұрақты экономикалық өсімді және қоғамның жан-жақты ілгерілеуін қамтамасыз етеді.
Халықтың әл-ауқатын арттыру - дамудың басты мақсаты. Сондықтан Қытай халқының өмір сапасын жақсартуға және әлеуметтік әділеттілікті қамтамасыз етуге бағытталған халыққа бағдарланған даму философиясын ұстануды жалғастырады. Қытайлық жаңғыру - бүкіл халықтың ортақ өркендеуін көздейді және оның нәтижелері қоғамның барлық мүшелеріне әділ үлестірілуі тиіс.
ҚКП-ның жан-жақты басшылығы жоғары сапалы дамудың негізгі кепілі болып табылады. Партияның орталық жетекшілігін сақтап, саяси тұтастықты қамтамасыз еткен жағдайда ғана елдің экономикалық және әлеуметтік дамуын үйлестірудің басты тетігі іске асады.
Қытай мен Қазақстан - жаңғыру жолындағы серіктестер
Пленумда сыртқы ашықтықты кеңейту, жаңа өсу тетіктерін ашу және жаңа артықшылықтар қалыптастыру қажеттігі атап өтілді. Бұл тек Қытай үшін ғана емес, барлық елдердің ортақ дамуына жаңа мүмкіндіктер туғызады.
Қытай Халық Республикасының Төрағасы Си Цзиньпин Қазақстан Президенті Қасым-Жомарт Тоқаевпен кездесуінде: «Қытай мен Қазақстан өз дамуы мен өрлеуінің шешуші кезеңінде тұр. Біз жаңғыру жолындағы серіктеспіз», - деп атап өтті.
Қытай тарапы 15-бесжылдық жоспарды әзірлеу және іске асыру барысында Қазақстанмен даму стратегияларын өзара ұштастыруды, саяси сенімді нығайтуды және екі елдің негізгі мүдделеріне қатысты мәселелер бойынша бір-біріне қолдау көрсетуді жалғастыруға дайын. Сонымен қатар, Қытай мен Қазақстан өзара тиімді ынтымақтастықты кеңейтіп, мәңгі достыққа, өзара сенім мен ынтымаққа негізделген ортақ тағдыр қауымдастығын құруды мақсат етеді. Бұл тек екі ел халқының игілігіне ғана емес, сонымен бірге тұрақсыздық пен сын-қатерлер өріс алған әлемге тұрақтылық пен позитивті энергия әкеледі.
