АҚШ-тың The Washington Post газеті «Қазақстанның Авраам келісімдеріне қызықты жолы» атты талдамалық мақаланы жариялады. Материалда Астананың осы халықаралық форматқа қосылу шешімі жан-жақты қарастырылып, бұл қадам салмақты және прагматикалық деп бағаланады. Сондай-ақ президент Қасым-Жомарт Тоқаевтың дипломатиялық стилі мен Қазақстанның сыртқы саясаттағы стратегиялық ұстанымы атап өтіледі.
Gov
Күтпеген, бірақ қисынды қадам
Вашингтонда Қазақстанның Авраам келісімдеріне қосылу жаңалығы қызу талқыланды. Кейбір сарапшылар бұл шешімді күтпегенін мойындады, өйткені ел дәстүрлі түрде көпвекторлы саясат ұстанып келеді. Алайда басылым атап өткендей, бұл шешім символдық емес, керісінше терең ойластырылған, АҚШ-пен және Таяу Шығыс елдерімен қатынасты нығайтуға бағытталған қадам, сонымен қатар Мәскеу мен Бейжіңмен тепе-теңдікті сақтайды.
The Washington Post келтірген америкалық сарапшылар бұл шешімді «шығыны аз, бірақ тиімді сигнал» деп сипаттайды. Олардың пікірінше, Қазақстан сыртқы саясаттағы тәуелсіз бағытын айқын көрсетіп, жаңа геосаяси жағдайда ынтымақтастықты кеңейту мүмкіндігін ұтымды пайдаланып отыр.
Вашингтонның мүддесі және жаңа жеткізу тізбектері
Мақалада экономикалық өлшем де талданады. Дональд Трамп әкімшілігі маңызды минералдардың баламалы жеткізу тізбектерін дамытуға басымдық беріп отырған сәтте, Қазақстан АҚШ үшін табиғи серіктес ретінде қарастырылады. Осы тұрғыдан алғанда, елдің Авраам келісімдеріне қатысуы тек саяси емес, сонымен бірге өзара экономикалық мүдделерді нығайтуға бағытталған кең ауқымды стратегияның бір бөлігі ретінде сипатталады.
Gov
Президент Тоқаевтың рөлі
Басылым президент Қасым-Жомарт Тоқаевтың тұлғасына жеке тоқталады. The Washington Post оның дипломатиялық тәжірибесін және сыртқы саясаттағы теңгерімді, прагматикалық ұстанымын ерекше атап өтеді. Мақалада Тоқаевтың АҚШ сапары қарсаңында айтқан сөзі келтірілген: Қазақстан «бейбітшілік, диалог және халықтар арасындағы өзара түсіністікті дамытуға әрдайым ұмтылады». Басылымның пікірінше, бұл сөздер елдің ұзақмерзімді стратегиясын айқын көрсетеді.
Америкалық басылымның пайымдауынша, Қазақстанның Авраам келісімдеріне қосылуы – сыртқы саясаттағы кемелдік пен дербестіктің белгісі. Вашингтонда бұл қадам елдер арасындағы сенімді нығайтудың және Қазақстанның халықаралық аренадағы рөлін кеңейтудің маңызды қадамы ретінде қабылдануда.
«Авраам келісімдеріне қосылу – Вашингтонның назарын Қазақстанға оң бағытта аудартатын ақылды және прагматикалық шешім», - деп жазады The Washington Post.
