Air Astana APEX 2026 нұсқасы бойынша Орталық Азияның ең үздік әуе компаниясы деп тағы да танылды, деп хабарлайды DKNews.kz.
Air Astana 2025 жылғы 12 қарашада Сингапурда өткен рәсімде «Орталық Азияның үздік әуе компаниясы» санатында Best Overall Airline Award APEX 2026 беделді сыйлығын алды.
«Бұл марапат — Air Astana ұжымының көпжылдық еңбегінің нәтижесі. Біз жолаушыларымызға жоғары деңгейдегі қызмет көрсету мен қауіпсіздікті заманауи экологиялық бастамалармен ұштастыра отырып, шынайы қазақстандық қонақжайлықты сыйлауға ұмтыламыз», — деді Air Astana борттық қызмет көрсету жөніндегі вице-президенті Елена Обухова.
Рәсім барысында Air Astana Linstol халықаралық компаниясымен серіктестікте құрылған Meridian бизнес-класының жаңа құлаққаптарын таныстырды. Қазақстандық қолөнер шеберлігінен шабыт алған бұл модель заманауи дизайн мен ұлттық өрнек элементтерін үйлестіріп, эргономділік, жұмсақ материалдары және шуды басу технологиясының арқасында жайлылық пен таза дыбысты қамтамасыз етеді.
Марапаттау рәсімі APEX FTE Asia EXPO 2025 - Азия-Тынық мұхиты өңіріндегі инновацияларға, технологияларға және жолаушылар тәжірибесін жақсартуға арналған ірі көрме аясында өтті. Іс-шара жетекші әуе компанияларды, әуежайларды, жеткізушілер мен сала сарапшыларын біріктіріп, цифрлық трансформация, орнықты даму және клиенттік сервис саласындағы соңғы жетістіктерді таныстырды.
Бұған дейін, 2025 жылғы қыркүйекте Air Astana алтыншы рет АҚШ-та марапаттау рәсімі өткен «Ірі әуе компаниялары» санатында бес APEX жұлдызын алған болатын. APEX сыйлықтарымен марапаттау Солтүстік Америка мен Азияда жылына екі рет өткізіледі.
