Қазақстан Президенті Қасым-Жомарт Тоқаев Өзбекстан Президенті Шавкат Мирзиёевтің шақыруымен мемлекеттік сапармен Ташкентке келді, деп хабарлайды DKNews.kz.
Біздің мемлекет басшысын Президент Шавкат Мирзиёев қарсы алды.
«Ташкент-Хумо» әуежайында мәртебелі мейманды құрметпен қарсы алу үшін Құрмет қарауылының ротасы сап түзеді.
Президент Қасым-Жомарт Тоқаевты ресми қарсы алу рәсімі өтті. Қазақстан мен Өзбекстанның мемлекеттік гимндері орындалып, Құрмет қарауылының бастығы рапорт берді. Рәсім соңында екі ел басшылары ресми делегация мүшелерін бір-біріне таныстырды.
«Ташкент-Хумо» халықаралық әуежайында мемлекет басшылары арасында әңгіме өтті.
Қасым-Жомарт Тоқаев пен Шавкат Мирзиёев қазақ-өзбек стратегиялық әріптестігі мен одақтастығын тереңдету мәселелері жөнінде пікір алмасты.
Ертең сапар бағдарламасына сәйкес президенттер келіссөздер жүргізеді, сондай-ақ олардың төрағалығымен Қазақстан мен Өзбекстанның Жоғары мемлекетаралық кеңесінің Екінші отырысы өтеді.
