Астраханда Абай Құнанбайұлының 180 жылдығына арналған поэтикалық-музыкалық кеш өтті, деп хабарлайды DKNews.kz.
Каспий теңіз және өзен көлігі институтында қазақтың көрнекті ақыны, ағартушысы және композиторы Абай Құнанбайұлының дүниеге келгеніне 180 жыл толуына орай салтанатты музыкалық-поэтикалық кеш өтті.
Аталған мәдени іс-шараға өңірдегі ресми тұлғалар мен қонақтар қатысып, РФ СІМ Астрахан қаласындағы өкілдігінің басшысы Олег Коломин, Астрахан облысының Сыртқы байланыстар министрінің міндетін атқарушы Илья Торопицын, Каспий теңізі және өзен көлігі институты директорының міндетін уақытша атқарушы Максим Карташов, «Жолдастық» қазақ мәдениеті қоғамдық ұйымының жетекшісі Равиль Арықбаев құттықтау сөз сөйледі.
Кештің маңыздылығын Қазақстан Республикасының Ресей Федерациясындағы Елшісі Дәурен Абаевтың құттықтау-жолдауы арттырды. Елші құттықтауында Абай философиясының тереңдігін, бүгінгі естелік күннің маңыздылығын атап өтіп, мұндай іс-шаралар мен кешенді мәдени бағдарламалардың қазақ және орыс халықтарының берік достығының айқын үлгісі екенін, сондай-ақ екі ел арасындағы мәдени-білім байланыстарды нығайтуға үлес қосатынын атап өтті.
Өз кезегінде, Қазақстан Республикасының Астрахан қаласындағы Бас консулы Қанат Хасенов сөз сөйлеп, Абай мұрасының ұлттық бірегейлікті қалыптастырудағы, мәдениет пен білім жүйесін дамытудағы, сондай-ақ қазақ халқының рухани-адамгершілік құндылықтарын нығайтудағы ерекше рөлін атап өтті.
Барлық қонақтар үшін ерекше көңіл-күй жасалып, қазақ қолөнерінің көрмесі халықтың бай мәдени мұрасына толығырақ үңілуге мүмкіндік берді. Кеште шығармашылық қойылымдар ұйымдастырылып, қазақ диаспорасының өкілдері мен қазақстандық курсанттар Абай әндері мен домбырада музыкалық әуендер орындады, сонымен қатар ұлы ақын мен ойшылдардың шығармаларынан көркем үзінділер оқылды.
Іс-шара аяқталғаннан кейін Қ.Хасенов Каспий теңіз және өзен көлігі институтында оқитын қазақстандық курсанттармен жеке кездесу өткізді. Кездесу барысында ол Бас консулдықтың қызметі туралы баяндап, Астраханда білім алып жүрген қазақстандық жастардың көші-қон ережелері мен ішкі заң талаптарын сақтауы, құқықтық тәртіпті бұзбауы және уақытылы консулдық есепке тіркелуі қажеттігін атап өтті. Кездесу диалог форматында өтіп, курсанттарды толғандырған басқа да мәселелер талқыланды.
