Швейцарияға ресми сапары аясында Қазақстан Республикасының Сыртқы істер министрі Ермек Кошербаев «EuroAirport» халықаралық әуежайының, контейнерлік тасымалдаудың жаһандық операторы «Mediterranean Shipping Company» (MSC) компаниясының, инвестициялық-технологиялық «Kanadevia Inova» тобының басшылығымен және индустриалды инвестор Роланд Бартолетпен кездесулер өткізді, деп хабарлайды DKNews.kz.
Кездесулердің басты мақсаты нақты инвестициялық жобаларды және швейцариялық компаниялардың Қазақстанның инфрақұрылымы мен агроөнеркәсіп кешенін дамыту мен жаңғыртуға қатысу мүмкіндіктерін талқылау болды.
Еуропаның негізгі көлік хабтарының бірі «EuroAirport» әуежайының бас директоры Тобиас Маркерт Азия мен Еуропа арасындағы жаңа жүк және транзиттік әуе маршруттарын Қазақстанның авиациялық инфрақұрылымының қатысуымен дамытуға дайындығын, сондай-ақ әуежайларды басқару саласындағы ынтымақтастыққа қызығушылық білдірді.
«MSC» тобының аға вице-президенті Эдуард Зигристпен кездесуде Қазақстанның порттық және логистикалық инфрақұрылымын дамыту перспективалары және Транскаспий халықаралық көлік бағдарына елді одан әрі интеграциялау мәселелері жан-жақты талқыланды. Компания әлемдік деңгейдегі теңіз және контейнерлік тасымалдау саласындағы көшбасшылардың бірі ретінде порттардың өткізу қабілетін кеңейтуге, терминалдық қуаттарды дамытуға және Хоргос пен Каспий арасындағы теміржол маршруттарын дамытуға инвестиция салу мүмкіндіктерін қарастырып отыр.
«Жасыл» технологиялар саласындағы жаһандық көшбасшыларының бірі «Kanadevia Inova» индустриалды-технологиялық тобының басқарма төрағасы Тадаси Иванага халықаралық қаржы институттарын тарту арқылы қалдықтарды энергияға айналдыру (Waste-to-Energy) жобаларын таныстырды. Компанияның кең тәжірибесі бар және Еуропа мен Азияның ірі қалаларында осындай жобаларды сәтті жүзеге асырған.
Тәуелсіз кәсіпкер және инвестор Р.Бартолет «Schnellstrom» компаниясын таныстыра отырып, энергияны сақтау жүйелерін құру, өнеркәсіптік өңірлер үшін энергетикалық инфрақұрылымды дамыту, сондай-ақ технологиялық шешімдерді Қазақстан аумағында локализациялау бойынша ынтымақтастық ұсынды.
ҚР Сыртқы істер министрі екіжақты тиімді ынтымақтастық технологиялар трансфері мен швейцариялық қатысуымен инвестициялық жобаларды кеңейтуге айтарлықтай әлеует ашатынын атап өтті.
Атап айтқанда, қалдықтарды өңдеу бойынша заманауи технологиялар енгізу, баламалы энергетиканы дамыту, энергетикалық және туристік инфрақұрылымның тиімділігін арттыру, сондай-ақ агроөнеркәсіп кешенін жаңғырту мәселелеріне ерекше көңіл бөлінді.
Кездесулер швейцариялық бизнес өкілдерінің Қазақстанға жоғары қызығушылық танытатынын және негізгі экономикалық секторларда бірлескен жобаларды іске асыруға дайын екенін нақты көрсетті. Е.Көшербаев Қазақстанның Швейцария үшін стратегиялық маңызды сауда-экономикалық серіктесі ретіндегі позициясын нығайтатын инвесторлар үшін қолайлы жағдай жасауға, озық технологиялар мен шешімдерді белсенді енгізуге бейілділігін растады.
