Димаш Құдайберген үшін аяқталып келе жатқан 2025 жыл ерекше жарқын әрі оқиғаларға бай болды. Бұл оқиғалар оның жеке шығармашылық жолының ғана емес, туған елінің де тарихына алтын әріппен жазылды. XXI ғасырдың алғашқы ширегінің аяқталуына жақындап келе жатып, DK Media Europe редакциясы әлемге танылған қазақстандық вокалистің басты жетістіктерін еске алуға шақырады — ол Отанында ғана емес, одан тыс жерлерде де үлкен құрмет пен сүйіспеншілікке ие болды.
Үш құрлықты қамтыған тарихи тур
2025 жылдың соңғы тоқсаны Димаш үшін оның елі мен ТМД мәдениеті тарихында бұрын-соңды болмаған оқиғаларға толы болды. Бұл табыстардың көпшілігі үш жыл бұрын Алматыда өткен ауқымды шоуынан бастау алған «Stranger» («Незнакомец») турымен байланысты еді.
Маңызды оқиғалардың қатарын Нью-Йорктегі әлемдегі ең беделді алаңдардың бірі — «Мэдисон Сквер Гарденде» (MSG) өткен триумфальды концерт ашты. Бұған дейін Қазақстаннан немесе ТМД-дан бірде-бір әртіс мұндай жетістікке жете алмаған. 5 қазанда Димаш Нью-Йорк төрінде дербес шоуына шамамен 20 мың көрермен жинады.
Маңызды кезеңдердің бірі — Мехико қаласында өткен екі тарихи концерт. Мыңдаған орын санаулы минуттарда сатылып кетті. Мұның өзі Мексика мен Қазақстан арасындағы мәдени байланыстардың жаңа кезеңіне бастау болды.
Нью-Йорктен кейін Қазақстан үшін сенсациялық жаңалық белгілі болды: Димаштың украина-америкалық композитор және аранжировщик Дмитро Гордонымен бірге жазған жаңа «Fire» трегі «Grammy» музыкалық жүлдесінің «Global Spin» жобасына енгізілді.
Америкадан кейін әнші Еуропаға жол тартты. Барселона, Лондон, Берлин және Ригадағы көрермендер ғана емес — залдар қазақ тілінде бірге ән шырқады.
Бұл — Димаш феномені. Әлемнің түкпір-түкпіріндегі Dear-жанұя сүйікті әншісіне оның ана тілінде қосылады. Қазақстанның бірде-бір әртісі мұндай нәтижеге, туған елі мен тіліне деген осындай сүйіспеншілікке қол жеткізген емес.
Музыкалық Олимптегі маңызды белес — Каирде өткен «Эхо пирамид» фестивалі аясындағы Қазақстан мен ТМД тарихындағы тұңғыш жеке концерт болды. Оның ерекшелігі — Гиза жазығы, көне пирамидалар, қырағы Сфинкс. Бұл — Африкадағы Димаштың алғашқы өнер көрсетуі.
«Жаңа құрлықта елімді таныстыру — мен үшін зор құрмет», — деді ол концерт алдында.
2025 жылы үш құрлықта өткен сегіз жеке шоу жер шарының бес құрлығынан көрермендерді біріктіріп, «Stranger» турын қорытындылады. Бағдарламасы ұқсас болғанымен, әр концерт — өзгеше.
Димаштың өзі де растайды:
«Әр концерт — бірегей. Әндер бірдей болса да — көрермен басқа».
Тур бағдарламасы жұртшылыққа ұнады. Әнші өз тыңдармандарына:
«Сіздер әр қадамымды ерекше сүйіспеншілікпен қолдайсыздар. Бар күшіммен ең әдемі өнерімді көрсетуге тырысамын»,
— деп алғысын білдірді.
Бұл сөздер — өткен кезеңнің қорытындысы ғана емес, жаңа биіктердің бастауы.
фото Ainur Adylbekova, DK Media Europe
Мәдениеттерді жалғайтын көпірлер
Димаш — ең алдымен әнші. Бірақ тек соншалық емес. Ол — мәдениеттерді жақындататын шынайы елшi.
Вьетнам астанасы Ханойдағы «Хо Гом» опера театрында өткен концерт соның бір дәлелі. Сахнаға үш елдің жұлдыздары шықты: Испаниядан — Пласидо Доминго, Латвиядан — Кристине Ополайс және Қазақстаннан — Димаш Құдайберген.
«Жұлдыздар түні» — опера мен кроссовер тоғысқан, классика мен заманауи музыка үйлескен ерекше кеш болды.
Қытайдағы маңызды алаңдар да оның танымалдығын арттырды.
Ол CMG ұйымдастыратын Қытай Жаңа жылының гала-концертінде үшінші рет өнер көрсетті — көрермендер саны 1,5 млрд-қа жетеді.
Сонымен қатар, Фонарлар мерекесіне қатысып, «Бейжіңнің орталық осі» бағдарламасында Гун Линнамен бірге «Феникс» пен «Қараторғайды» біріктіріп орындады.
Шанхай кинофестивалінің жабылу салтанатында Эдит Пиафтың «Hymne à l’amour» әнін шырқап, кинематографистерді тәнті етті.
Одан кейін — «Хунан ТВ» телекомпаниясымен жаңа деңгейдегі серіктестік. Димаш «Voice Beyond Horizon» («Голос за горизонтом») шоуының бас атқарушы продюсері болды.
2017 жылы дәл осы арнадағы «I Am Singer» шоуы оған әлемдік танымалдық әкелген еді. Бүгінде оның тыңдармандары 180 елде бар.
Жобаның түсірілімі Атырау, Маңғыстау, Алматы және Астанада өтті:
«Бұл — достықтың белгісі. Қазақстан мен Қытай ғана емес, басқа елдер үшін де», — деді продюсер Димаш.
Қазылар алқасында — Grammy жүлдегері Уолтер Афанасьев болды. Ол:
«Қазақстанға баруды көптен армандадым»,
— деп ағынан жарылды.
фото Ainur Adylbekova, DK Media Europe
Құрмет пен мойындау
Қырғызстандағы «Мейкин Азия» фестивалінде Димашқа Қырғызстанның Халық әртісі атағы берілді. Мәртебелі марапатты Президент Садыр Жапаров тапсырды.
Қазақстанда ол төртінші рет «Халықтың сүйіктісі» ұлттық сыйлығын алды.
Алматыда ҚазҰМУ студенттерімен кездесуде оған ҚазҰМУ-дың Құрметті профессоры атағы берілді — жастар тәрбиесі мен ел имиджіне қосқан үлесі үшін.
2025 жыл тек марапаттармен ғана емес, рухани миссиясымен де есте қалды.
Бұған дейін ол БҰҰ-ның Халықаралық көші-қон ұйымының (МОМ) Аймақтық Ізгі ниет елшісі болған болса, 8 желтоқсанда — Глобал Елші мәртебесіне ие болды.
фото Ainur Adylbekova, DK Media Europe
МОМ бас директоры Эми Поуп:
«Димаш даусын адамдарды ғана емес, дағдарыстан жапа шеккендерді де естірту үшін пайдаланады»,
— деп баға берді.
Ал әншінің өзі:
«Менің миссиям — адамзатты біріктіру, бейбітшілік пен түсіністікке шақыру»,
— деді.
Алда не күтіп тұр?
Келесі жыл да жарқын болмақ. «Stranger» орнына жаңа бағдарлама келеді.
Әлем тыңдармандарын жаңа шоу, «Voice Beyond Horizon» тележобасы және сәуірде Будапештегі ерекше концерт күтіп тұр.
Димаш айтпақшы:
«Көре жатармыз».
