Қазақстан халықаралық академиялық әріптестікті дамытуға басымдық беріп отыр. Қазақстан Республикасының Бельгиядағы Елшісі Роман Василенко Бельгияның жетекші жоғары оқу орындарының бірі - Université de Mons (UMONS) университетінің ректоры, профессор Филипп Дюбуамен кездесті. Кездесу барысында жоғары білім беру, академиялық ұтқырлық және қолданбалы ғылыми зерттеулер саласындағы ынтымақтастықты кеңейту мәселелері талқыланды, деп хабарлайды DKNews.kz.
Тараптар университеттер арасындағы өзара іс-қимылды практикалық деңгейге шығару қажеттігін атап өтті. Әңгіме тек студенттер мен оқытушылар алмасуымен шектелмей, нақты ғылыми жобаларды бірлесіп жүзеге асыру, зерттеу нәтижелерін өндіріске енгізу мүмкіндіктері жөнінде өрбіді.
Бельгиядағы ғылыми-білім беру орталығы
UMONS - ғылыми зерттеулерге бағытталған, халықаралық деңгейде танылған университеттердің бірі. Мұнда бүгінде шамамен 12 мың студент білім алады, халықаралық бағдарламалар жүзеге асырылады және 50-ден астам елдің серіктестерімен бірлескен ғылыми жұмыстар жүргізіледі. Университет халықаралық академиялық рейтингтерде тұрақты түрде көрініп, ғылыми жарияланымдар мен бірлескен зерттеулер сапасы бойынша жоғары бағаланып келеді.
Қазақстан - ашық академиялық кеңістік
Кездесу барысында Роман Василенко Қазақстанның ашық академиялық кеңістік қалыптастырып жатқанын атап өтті. Оның айтуынша, бүгінде елде шамамен 40 шетелдік және бірлескен университет, сондай-ақ қос дипломды білім беру бағдарламалары жұмыс істейді. Бұл студенттер мен ғалымдардың халықаралық алмасуына кең мүмкіндіктер ашып отыр.
«Қазақстан практикалық ынтымақтастыққа мүдделі - академиялық ұтқырлықтан бастап қолданбалы зерттеулер мен технологиялық өзара іс-қимылға дейін. Бельгиялық студенттер мен оқытушылар тарапынан қызығушылық бар, біз бұл үрдісті болашағы зор бағыт деп санаймыз», - деді Елші.
Нақты қадамдар бар
UMONS пен қазақстандық жоғары оқу орындары арасындағы ынтымақтастық қазірдің өзінде жүзеге асып келеді. Университет қазақстандық серіктестермен академиялық ұтқырлық бағдарламалары аясында жұмыс істейді. 2026 жылғы ақпан айынан бастап UMONS-тың бес студенті Әл-Фараби атындағы Қазақ ұлттық университеті базасында бір семестр бойы білім алып, тілдерді, мәдениетті меңгеріп, университетаралық білім беру бағдарламаларына қатысады.
Сонымен қатар қазақстандық студенттер Монс қаласында тілдер факультетінде оқып, еуропалық білім беру жүйесімен және халықаралық академиялық ортамен тәжірибе жинақтауда.
Филипп Дюбуа да Қазақстанмен ғылыми бағыттағы ынтымақтастықты кеңейтуге мүдделі екенін жеткізді.
«Біз қазақстандық университеттермен алмасу бағдарламалары ғана емес, ғылым саласындағы серіктестікті де дамытқымыз келеді. UMONS халықаралық зерттеу жобаларын жүзеге асыруда мол тәжірибеге ие және Қазақстанмен бірлескен жобаларды кеңейтуге нақты әлеует бар», - деді университет ректоры.
Қолданбалы ғылым мен инновация
Кездесуден кейін қазақстандық делегация UMONS жанынан құрылған Materia Nova зерттеу орталығына барды. Бұл орталық инновациялық материалдар, жабындар мен полимерлерді әзірлеумен, сондай-ақ технологияларды өнеркәсіпке трансферттеумен айналысады.
Materia Nova орталығында 100-ге жуық ғылыми қызметкер жұмыс істейді және 300-ден астам сыртқы сарапшымен әріптестік орнатылған. Бұл оны Еуропадағы материалтану саласындағы ірі ғылыми ойыншылардың біріне айналдырып отыр.
Алдағы жоспарлар
Кездесу қорытындысы бойынша тараптар академиялық ұтқырлық пен қолданбалы ғылыми зерттеулер саласындағы ынтымақтастықты одан әрі кеңейтуге дайын екенін білдірді. Сонымен қатар UMONS басшылығының Қазақстанға сапарын ұйымдастыру және отандық университеттер мен ғылыми орталықтармен мазмұнды кездесулер өткізу мүмкіндігі талқыланды.
Сарапшылардың пікірінше, мұндай әріптестік Қазақстанның халықаралық академиялық кеңістіктегі орнын нығайтып қана қоймай, ғылым мен технологияның дамуына да жаңа серпін береді.
