Венесуэлада саяси әрі әскери дағдарыстың жаңа кезеңі басталды. Елдің уақытша президенті Делси Родригес АҚШ тарапынан 3 қаңтарда ұсталған президент Николас Мадуро мен оның жұбайы Силия Флоресті отанына қайтаруға қол жеткізетінін мәлімдеді, деп хабарлайды DKNews.kz.
Бұл туралы Делси Родригес сенбі күні Миранда штатында өткен қоғамдық іс-шарада айтты. Оның сөзі Латын Америкасының заманауи тарихында бұрын-соңды болмаған оқиғалардан кейінгі алғашқы ірі саяси мәлімдеме ретінде қабылданды.
«Ешқандай белгісіздік жоқ»
Делси Родригестің айтуынша, президенттің уақытша елде болмауына қарамастан, Венесуэлада билік вакуумы жоқ.
Мұнда ешқандай белгісіздік жоқ. Венесуэла халқы билік басында, ал елде президент Николас Мадуро басқаратын үкімет бар, - деді ол жақтастарына үн қатып.
Уақытша президент венесуэлалықтарды ұлттық бірлікке шақырып, қазіргі жағдайда тек қоғамның ұйысуы ғана елге бейбітшілік, тұрақтылық пен болашақ әкеле алатынын атап өтті.
«Тоқтаусыз жұмыс істейміз»
Родригес Николас Мадуро мен оның жұбайын қайтару өз қызметіндегі басты міндет екенін ерекше атап өтті.
Президент Николас Мадуро мен Силия Флорес Венесуэлаға оралмайынша, біз бір сәтке де дамыл алмай жұмыс істейміз, - деді ол.
Бұл сөздер билік жақтастарының ұзақ қол соғуына ұласты және жиындағы ең эмоциялық сәттердің біріне айналды.
«Бүгін біз оның бостандығы үшін ант береміз»
Өз сөзінде Делси Родригес бір жыл бұрын Николас Мадуромен бірге оның үшінші президенттік мерзімінің басталуына орай ант қабылдағанын еске салды.
Ол кезде біз ел мен халыққа адал болуға ант еттік. Ал бүгін, тура бір жылдан кейін, біз оның бостандығы үшін ант беріп отырмыз, - деді ол.
Родригестің айтуынша, үкімет төтенше жағдайға қарамастан, Николас Мадуро айқындап кеткен жеті негізгі бағыт бойынша жұмысын жалғастырып жатыр.
Каракасқа жасалған соққылар және әлемнің реакциясы
Еске сала кетейік, 3 қаңтарда АҚШ Қарулы күштері Каракасқа және Венесуэланың тағы үш қаласына әскери соққы жасады. Ел билігінің мәлімдеуінше, осы операция барысында Николас Мадуро мен оның жұбайы ұсталған.
Бұл оқиғалар халықаралық аренада кең резонанс тудырды. Көптеген мемлекеттер күш қолдануды айыптап, аймақтағы жағдайдың ушығуына алаңдаушылық білдірді.
Сарапшылардың пікірінше, бұл дағдарыс Венесуэланың өзіне ғана емес, Батыс жартышардағы халықаралық қатынастар жүйесіне де ұзақ мерзімді әсер етуі мүмкін.
Алда не күтіп тұр
Каракаста Николас Мадуроны қайтару мәселесі елдің ішкі және сыртқы саясатының негізгі тақырыбына айналып отырғанын ашық айтып отыр. Санкциялар, әскери қысым және АҚШ-пен текетірес аясында Венесуэла өз болашағын айқындайтын шешуші кезеңге аяқ басты.
Енді басты сұрақ - «тоқтаусыз жұмыс істеу» туралы уәде нақты дипломатиялық нәтижеге алып келе ме, әлде әлем тағы бір ұзаққа созылатын халықаралық қақтығыстың табалдырығында тұр ма?
