Халықаралық Agoda цифрлық туристік платформасы Алматы қаласын Азиядағы 2026 жылға арналған ең үздік қысқы курорттық бағыттардың топ-4 тізіміне енгізді. Бұл рейтингке Қазақстанмен қатар Жапониядағы Нисеко, Үндістандағы Гульмарг және Оңтүстік Кореядағы Пхенчхан курорттары да енген, деп хабарлайды DKNews.kz.
Сарапшылардың пікірінше, бұл тізім Азиядағы қысқы туризмнің жаңа трендтерін айқындап, саяхатшылардың дәстүрлі бағыттардан тыс өңірлерге қызығушылығы артып келе жатқанын көрсетеді.
Алматы – қала мен табиғат үйлескен бағыт
Agoda бағалауында Алматы динамикалық туристік бағыт ретінде ерекше аталады. Қала саяхатшыларды заманауи қалалық инфрақұрылым, тау мен табиғатқа жақын орналасу, сондай-ақ бай мәдени және гастрономиялық өмірімен тартады.
Алматының басты артықшылықтарының бірі – мегаполис пен тау курорттарының бір-біріне жақын орналасуы. Қала қонақтары қыс мезгілінде шаңғы теуіп, сноубордпен сырғанаумен қатар, театрлар мен музейлерге барып, мейрамханалардағы ұлттық және әлемдік асхананың дәмін тата алады.
Азияның қысқы курорттары неге сұранысқа ие
Agoda сарапшыларының айтуынша, Азиядағы қысқы бағыттар туристерге табиғи әсемдік, заманауи инфрақұрылым және мәдени әртүрліліктің бірегей үйлесімін ұсынады. Сонымен қатар, көптеген саяхатшылар үшін бұл бағыттар Еуропамен салыстырғанда баға мен сапа арақатынасы жағынан тиімді болып отыр.
Алматының рейтингке енуі Орталық Азияға деген халықаралық қызығушылықтың артып келе жатқанын және Қазақстанның төрт маусымға лайық туристік ел ретінде қалыптасып жатқанын аңғартады.
Agoda туралы не білеміз
Agoda – Booking Holdings корпорациясының құрамына кіретін ірі цифрлық туристік платформа. Сервис әсіресе Оңтүстік-Шығыс Азия елдерінде кеңінен танымал, алайда бүгінде әлемнің түкпір-түкпіріндегі саяхатшылар арасында сұранысқа ие.
Платформа:
- 6 миллионнан астам қонақ үй мен туроператорға,
- 130 мыңнан астам әуе бағытына,
- 300 мыңнан астам іс-шара мен туристік белсенділікке қолжетімділік ұсынады.
Agoda рейтингтері мен ұсынымдары туристік сұраныс, брондау деректері және жаһандық трендтер негізінде жасалады.
Қазақстан туризміне жаңа серпін
Алматының Азиядағы үздік қысқы бағыттардың қатарына енуі Қазақстан туризмі үшін маңызды халықаралық мойындау болып отыр. Бұл шетелдік туристер ағынын арттырып қана қоймай, инфрақұрылым мен сервисті дамытуға, инвестиция тартуға да оң әсер етуі мүмкін.
Сарапшылардың айтуынша, мұндай рейтингтер Қазақстанның туристік имиджін нығайтып, елді жаһандық саяхат картасында жаңа деңгейге шығарады.
