Қазақстан мен Мысыр арасындағы гуманитарлық ынтымақтастық жаңа бағыттармен толығуда. Қазақстанның Мысыр Араб Республикасындағы Елшісі Асқар Жеңіс Мысыр Премьер-министрінің Адам дамуы жөніндегі орынбасары – Денсаулық сақтау және халық саны министрі Халед Абдел-Ғаффармен кездесті, деп хабарлайды DKNews.kz.
Кездесу барысында тараптар денсаулық сақтау, медицина және фармацевтика өнеркәсібі салаларында ынтымақтастықты дамыту мәселелеріне ерекше назар аударды. Әңгіме тек классикалық медициналық қызметтермен шектелмей, саланың кең ауқымды бағыттарын қамтыды.
Атап айтқанда, дәстүрлі медицина, фармацевтика, эпидемиология және басқа да салаларда бірлескен жобаларды іске асыру мүмкіндіктері талқыланды. Тараптар қазіргі жаһандық сын-қатерлер жағдайында медициналық жүйелер арасындағы өзара тәжірибе алмасудың маңызы артып келе жатқанын атап өтті.
Сонымен қатар, білікті дәрігерлер мен ғалымдар арасында тұрақты тәжірибе алмасу, халықаралық конференциялар мен көрмелер аясында маңызды індет аурулары бойынша ақпараттар мен деректерді бөлісу мәселелері қарастырылды. Әсіресе екі елдің жетекші медицина ғалымдары арасында тығыз байланыс орнату, оның ішінде күрделі оталар жасайтын мамандар арасында кәсіби тәжірибе алмасуды жолға қоюға басымдық берілді.
Кездесу барысында Асқар Жеңіс Қазақстан Президенті Қасым-Жомарт Тоқаевтың 2026 жылды «Цифрландыру және жасанды интеллект жылы» деп жариялағанын атап өтті. Ол елімізде жасанды интеллект технологияларын пайдалана отырып, медициналық қызметтердің сапасы мен көлеміне мониторинг жүргізетін жаңа жүйе құру бойынша жұмыстар басталғанын жеткізді.
Қазақ дипломаты сондай-ақ Қазақстанда дәрігерлердің мәртебесін арттыру және олардың әлеуметтік жағдайын жақсарту бағытында қабылданып жатқан нақты шаралар туралы кеңінен мәлімет берді. Бұл қадамдар денсаулық сақтау саласының тұрақты дамуына және медициналық кадрларды қолдауға бағытталғаны айтылды.
Өз кезегінде Халед Абдел-Ғаффар қазақстандық тараптың ұсыныстарына қызығушылық танытып, оларды бірлесе жүзеге асыруға дайын екенін білдірді. Ол аталған бастамалар мен келісімдердің табысты болатынына сенім білдіріп, Мысыр тарапы тарапынан жан-жақты қолдау көрсетілетінін атап өтті.
Сарапшылардың пікірінше, Қазақстан мен Мысыр арасындағы медицина саласындағы әріптестіктің кеңеюі екі елдің ғана емес, жалпы өңірлік денсаулық сақтау жүйелерінің дамуына оң әсер етуі мүмкін.
