Германия Nazarbayev University дипломдарын және институционалдық сапа стандарттарын ресми мойындады, деп хабарлайды DKNews.kz.
Федералдық Германия Республикасы Nazarbayev Uniersity (NU) институционалдық аккредитациясын ресми түрде мойындады, бұл Ұлыбританияның Quality Assurance Agency for Higher Education (QAA) агенттігінің аккредитациясынан кейін жасалды. Бұл мойындау NU-дың институционалдық аккредитациясының 2030 жылғы 20 шілдеге дейін жарамды екенін растайды.
NU 2025 жылғы тамызда QAA-ның халықаралық сапа тексеруі (IQR) нәтижесінде институционалдық аккредитация алды, бұл университеттің халықаралық білім стандарттарына сәйкестігін көрсетеді. IQR аккредитациясын алу арқылы NU сияқты оқу орындары өздерінің сапасы мен стандарттарын халықаралық деңгейде көрсетуге, біліктіліктерді тануды жеңілдетуге және өз аймағынан тыс оқу орындарымен академиялық диалог бастауға мүмкіндік алады.
Нәтижесінде NU-да берілген академиялық құжаттар Германияда жоғары білім алғанын растайтын құжат ретінде мойындалуы мүмкін, егер олар аккредиттелген оқу бағдарламасы аясында алынған болса. Бағдарламаның аккредитациясы танылған аккредитациялық агенттік арқылы жүзеге асырылуы тиіс.
Германия Федералдық Республикасының Аймақтар министрлерінің білім және мәдениет жөніндегі тұрақты конференциясының (KMK) Бас хатшысы Удо Михаллик пікір білдірді:
«Бұл шешім NU-дың институционалдық деңгейдегі қалыптасқан сапа стандарттарын растайды және берілген біліктіліктерді айқын және біркелкі танудың негізін қалыптастырады»
Бұрын хабарланғандай, NU Қытай Халық Республикасының Білім министрлігінің Ғылыми алмасу қызметі орталығының (CSCSE) аккредитациясын алды, бұл түлектердің дипломдарының Қытайдағы жұмыс берушілер тарапынан ресми түрде мойындалуын қамтамасыз етеді.
Бұл маңызды жетістік NU-дың халықаралық жоғары білім стандарттарын сақтауға деген міндеттемесін нығайтады және оның түлектерінің Германия мен одан тыс жерлерде академиялық және кәсіби мобильдігін қамтамасыз етеді.
