Қазақстан Германия астанасында өткен 100-ші мерейтойлық Халықаралық аграрлық «Жасыл апта» (Grüne Woche) көрмесіне қатысып, Республика атынан екі ұлттық стендті салтанатты түрде ашты. Әлемдегі ең ірі аграрлық көрмелердің бірі саналатын бұл алаң Қазақстан үшін еуропалық нарыққа шығудың маңызды мүмкіндігіне айналды, деп хабарлайды DKNews.kz.
Еуропа нарығына дайын қазақстандық өнімдер
Көрмеге Еуропалық одақ стандарттары бойынша жұмыс істейтін және еуропалық нарыққа тұрақты жеткізілім жасауға дайын қазақстандық кәсіпорындар қатысты. Отандық өндірушілер ұсынған өнімдер халықаралық серіктестердің, дистрибьюторлардың, Германияның сауда желілері өкілдерінің және көрме қонақтарының айрықша қызығушылығын тудырды.
Сарапшылардың айтуынша, бұл Қазақстан агроөнеркәсіптік кешенінің экспорттық әлеуеті жыл сайын артып келе жатқанын көрсетеді.
Делегацияны вице-министр бастап барды
Қазақстандық делегацияны Ауыл шаруашылығы вице-министрі Азат Сұлтанов бастап барды. Сапар аясында ол Global Forum for Food and Agriculture (GFFA) халықаралық конференциясының алаңында бірқатар маңызды кездесулер мен келіссөздер өткізді.
Германиямен аграрлық әріптестікті тереңдету
Вице-министрдің Германияның Ауыл шаруашылығы, азық-түлік және отан федералдық министрлігінің (BMLEH) статс-хатшысы Маркус Шикпен өткен кездесуінде ынтымақтастықты кеңейту және тереңдету мәселелері жан-жақты талқыланды.
Атап айтқанда, тараптар өсімдік шаруашылығы, мал шаруашылығы және ветеринария, тұқым шаруашылығы, орнықты егіншілік, энергия мен су үнемдейтін технологияларды енгізу, сондай-ақ азық-түлік өнімдерін өңдеу және жеткізу бағыттарына ерекше назар аударды.
Германия министрін Астанаға шақыру
Қазақстан тарапы қол жеткізілген келісімдерді жалғастыру және оларды нақты жобалар арқылы дамыту мақсатында Германияның Ауыл шаруашылығы, азық-түлік және отан федералдық министрі Алоис Райнерді Астанаға ресми сапармен келуге шақырды.
Бірлескен жобалар және кадрлық әлеует
Сапар барысында Азат Сұлтанов ҚР Ауыл шаруашылығы министрлігі мен BMLEH арасында жүзеге асырылып жатқан «Аграрлық-саяси диалог» және «Сүтті мал шаруашылығы саласында құзыреттерді арттыру» кооперациялық жобаларының басшыларымен кездесті. Бұл жобалар тәжірибе алмасуға, кадр даярлауға және заманауи аграрлық тәсілдерді енгізуге бағытталған.
CLAAS-пен локализацияны арттыру мәселесі
Сонымен қатар Қазақстанда өндірілетін ауыл шаруашылығы техникасының жергіліктендіру деңгейін арттыру және өндіріс аясын кеңейту мәселелері CLAAS компаниясы басқарма мүшесі Кристиан Радонс және Шығыс Еуропа мен Орталық Азия өңірі бойынша вице-президент Михаэль Байермен талқыланды.
Достықтың символы - 100 қызғалдақ
Қазақстан мен Германия арасындағы достық пен серіктестіктің белгісі ретінде, сондай-ақ «Grüne Woche» көрмесінің 100 жылдығына орай, көрме ұйымдастырушыларына Қазақстан Республикасы атынан 100 дана қазақстандық қызғалдақтың пиязшықтары сыйға тартылды. Бұл символдық сый екі ел арасындағы мәдени және экономикалық байланыстың тереңдігін көрсетті.
Экспорт пен инновацияға бағытталған саясат
Сапар қорытындысы бойынша Қазақстан халықаралық ынтымақтастықты кеңейтуге, шетелдік серіктестермен іскерлік байланыстарды нығайтуға және аграрлық саланы дамытуда инновациялық тәсілдерді белсенді енгізуге дайын екенін растады.
