Қазақстан Республикасының Сыртқы істер министрі Ермек Көшербаев әлемге танымал инвестор, Orascom Investment Holding компаниясының төрағасы Нагиб Савириспен кездесу өткізді. Тараптар Қазақстандағы инвестициялық ахуал мен бірлескен жобалардың болашағын талқылап, ынтымақтастықты кеңейтуге дайын екендерін білдірді, деп хабарлайды DKNews.kz.
Кездесу барысында тау-кен және металлургия салалары, қаржы секторы, туризм және девелопмент негізгі басым бағыттар ретінде қаралды. Әсіресе Қазақстанның жаһандық қосылған құн тізбектеріне интеграциялану, сондай-ақ халықаралық тәжірибесі бар стратегиялық жеке инвесторларды тарту жөніндегі саясатына ерекше назар аударылды.
Қазақстан – ұзақ мерзімді инвестициялар үшін сенімді алаң
Сыртқы саяси ведомствоның басшысы Қазақстанның ашық әрі болжамды инвестициялық ортаға ие ел екенін атап өтті. Оның айтуынша, инвесторлармен сенімді және жүйелі диалог орнату – мемлекеттің инвестициялық саясатының басты қағидаттарының бірі.
Ермек Көшербаев Қазақстанда инвестициялық жобаларды іске асырудың барлық кезеңінде жан-жақты қолдау көрсетілетінін, бұл ірі халықаралық инвесторлар үшін маңызды фактор екенін жеткізді.
Orascom Қазақстанды өңірлік инвестициялық хаб ретінде қарастырады
Нагиб Савирис өз кезегінде Қазақстанның макроэкономикалық тұрақтылығын, бай ресурстық әлеуетін және Орталық Азиядағы өңірлік инвестициялық хаб ретіндегі рөлінің күшейіп келе жатқанын жоғары бағалады.
Ол шешім қабылдайтын тұлғалармен тікелей әрі ашық диалог жүргізудің маңыздылығына тоқталып, Қазақстандағы жобаларды тереңірек зерделеуге және қазақстандық серіктестермен ұзақ мерзімді ынтымақтастық орнатуға қызығушылық білдірді.
Қаржы секторынан жаңа бағыттарға дейін
Кездесу аясында тараптар перспективалы жобалар, соның ішінде қаржы секторына инвестициялар тарту мүмкіндіктері жөнінде пікір алмасты. Сонымен қатар ынтымақтастықты жаңа бағыттарда кеңейтуге екі жақтың да мүдделі екені атап өтілді.
Кездесу қорытындысы бойынша сұхбаттастар қол жеткізілген уағдаластықтарды практикалық тұрғыда іске асыруға және өзара іс-қимылды одан әрі дамытуға барлық қажетті күш-жігерді жұмылдыруға дайын екендерін білдірді.
Нагиб Савирис туралы
Нагиб Савирис – 28-ден астам елде қызмет ететін Orascom Telecom компаниясының негізін қалаушы, халықаралық деңгейдегі ірі инвестор. Қазіргі таңда ол Orascom Investment Holding, La Mancha Holding (тау-кен және металлургия кешені) және Ora Developers (жылжымайтын мүлік пен туризм) арқылы әртараптандырылған жаһандық инвестициялық портфельді басқарады.
